پاکستانی نژاد جاپانی شہری عقیل بخاری نے جاپان میں کِک باکسنگ کا اہم ٹائٹل جیت کر ملک کا نام روشن کردیا ہے۔
جاپان کی معروف سماجی و کاروباری شخصیت حسن بخاری کے صاحبزادے عقیل بخاری جاپان کے کِک باکسنگ کے شعبے میں تیزی سے اپنا مقام بنا رہے ہیں۔
اس حوالے سے گزشتہ دنوں کِک باکسنگ کا اہم ٹورنامنٹ K-1 Krush 138 کا انعقاد ہوا جس میں 24 سے زائد بہترین باکسرز نے شرکت کی،اس ٹورنامنٹ میں اپنی ناقابلِ شکست پرفارمنس سے عقیل بخاری نے یہ ٹورنامنٹ جیت لیا۔
ٹورنامنٹ کے فائنل میچ میں عقیل بخاری نے اپنے مخالف حریف کو زبردست مقابلے کے بعد شکست دے کر ٹائٹل اپنے نام کرلیا۔
عقیل بخاری کے والد حسن بخاری نے اس حوالے سے کہا کہ عقیل بخاری نے اپنے شوق سے اس کھیل کا انتخاب کیا ہے۔
Advertisement
انہوں نے مزید کہا کہ بطور والدین میں اور میری اہلیہ بھی عقیل کے حوالے سے فکر مند رہتے ہیں تاہم اس بات پر خوش ہیں کہ وہ کامیابی حاصل کرتا ہے اور پاکستان اور جاپان کا نام روشن کر رہا ہے۔