بھارت، عامر خان کے ساتھی سے کروڑوں کی ڈیجیٹل کرنسی برآمد

By admin On اکتوبر 20, 2022

بھارت میں انفورسمنٹ ڈائرکٹوریٹ نے گیمنگ ایپ کے فراڈ میں نامزد مرکزی ملزم کے قریبی ساتھی سے کروڑوں روپے کی ڈیجیٹل کرنسی برآمد کر لی۔

تفصیلات کے مطابق انفورسمنٹ ڈائریکٹوریٹ (ای ڈی) نے ای نگیٹس کے ماسٹر مائنڈ اور کروڑوں روپے کے موبائل گیمنگ ایپ فراڈ کے کلیدی ملزم عامر خان کے ایک معاون کے گھر سے 1.6 کروڑ روپے نقد اور 7 کروڑ روپے کی ڈیجیٹل کرنسی برآمد کیے ہیں۔

یہ ضبطی بدھ کی دیر رات کولکاتہ کے الٹا ڈانگا میں رومین اگروال کی رہائش سے کی گئی۔

ای ڈی حکام نے رومین اگروال کو حراست میں لے لیا اور ان کی رہائش سے کئی ڈائریاں اور ایک لیپ ٹاپ بھی ضبط کیا۔ سازش کا ایک اور ملزم امیش اگروال ابھی تک مفرور ہے۔

ای ڈی ذرائع نے بتایا کہ ضبط کئے گئے لیپ ٹاپ اور ڈائریوں سے انہوں نے کئی رابطوں کی تفصیلات حاصل کی ہیں جن کے بارے میں خیال ہے کہ وہ دھوکہ دہی کا حصہ ہیں۔

اس تازہ ضبطی کے ساتھ ہی ای ڈی اور کولکاتہ پولیس کی مجموعی ضبطی 141.47 کروڑ روپے تک پہنچ گئی۔

اس معاملے کی جانچ 10 ستمبر کو شروع ہوئی جب ای ڈی نے جنوبی کولکاتہ کے گارڈن ریچ علاقے میں واقع شاہی اصطبل لین میں واقع کلیدی ملزم عامر خان کے والد نصر خان کے گھر سے 17.32 کروڑ روپے برآمد کئے تھے۔

اس وقت تک عامر فرار تھا، بعد ازاں کولکاتہ پولیس نے عامر خان کو اتر پردیش کے غازی آباد سے گرفتار کیا، سٹی پولیس نے اس کے پانچ قریبی ساتھیوں کو بھی گرفتار کر لیا ہے۔

عامر خان کا ایک اور قریبی ساتھی سبھوجیت شریمانی مفرور ہے اور سٹی پولیس نے اس کے خلاف لک آؤٹ نوٹس جاری کیا ہے، خیال کیا جاتا ہے کہ اس نے حال ہی میں دبئی میں پناہ لی ہے۔

عامر خان نے ای نگیٹس کے نام سے ایک موبائل گیمنگ ایپلی کیشن لانچ کیا تھا، جسے عوام کو دھوکہ دینے کے مقصد سے ڈیزائن کیا گیا تھا۔

شروعات میں صارفین کو کمیشن سے نوازا گیا اور بیلنس بغیر کسی پریشانی کے نکالا جا سکتا تھا، جس سے انہیں اعتماد حاصل ہوا اور انہوں نے زیادہ فیصد کمیشن اور زیادہ تعداد میں خریداری کے لیے بڑی رقم کی سرمایہ کاری شروع کر دی۔

عوام سے کافی رقم جمع کرنے کے بعد اس ایپ سے پیسے نکالنے پر کسی نہ کسی بہانے پابندی لگا دی گئی۔ اس کے بعد پروفائل کی معلومات سمیت تمام ڈیٹا ایپ سرور سے مٹا دیا گیا۔