جنوبی افریقا کی پولیس نے کہا ہے کہ ایک نائٹ کلب میں کم از کم 20 افراد پراسرار طور پر مردہ پائے گئے ہیں۔
فرانسیسی خبر رساں ادارے اے ایف پی کے مطابق اتوار کی صبح جنوبی افریقا کے شہر ایسٹ لندن کے ایک مضافاتی علاقے میں واقع نائٹ کلب سے ان 20 افراد کی لاشیں برآمد ہوئی ہیں۔
پولیس کے سربراہ بریگیڈیئر تمبنکوسی کینانا نے مقامی میڈیا کو بتایا ہے کہ وہ فی الحال کوئی بھی قیاس آرائی نہیں کرنا چاہتے کیونکہ فوری طور پر ان افراد کی موت کی وجہ معلوم نہیں ہو سکی ہے تاہم مقامی پولیس واقعے کی تحقیقات کر رہی ہے۔ اُن کے مطابق مقتولین کی عمریں 18 سے 20 سال کے درمیان ہیں۔
Advertisement
سوشل میڈیا پر شیئر کی گئی غیر تصدیق شدہ تصاویر میں دیکھا جا سکتا ہے کہ لاشیں کلب میں بکھری پڑی ہیں اور ان پر زخموں کے واضح نشان نہیں ہیں۔ میڈیا رپورٹس کے مطابق پولیس افسران کلب کے باہر ہجوم کو پُرسکون کرنے کی کوشش کر رہے ہیں۔
مشرقی صوبے کیپ کی پولیس کمشنر للیئن مین نے ایس اے بی سی نیوز سے بات کرتے ہوئے کہا کہ کلب میں مبینہ طور پر بھگدڑ مچ گئی تھی۔ تاہم صوبے کی کمیونٹی اور سیفٹی ڈیپارٹمنٹ کے عہدیدار اونیتھی بنکوز جو جائے وقوعہ پر موجود تھے، کا کہنا ہے کہ یہ یقین کرنا مشکل ہے کہ لوگوں کی اموات بھگدڑ مچنے سے ہوئیں کیونکہ مرنے والے افراد کے جسموں پر زخموں کے واضح نشانات نہیں تھے۔ اونیتھی بنکوز کے مطابق لوگ اپنے پیاروں کی تلاش میں کلب کے باہر کھڑے ہیں۔