برطانوی شاہی خاندان کے ذرائع نے کہا ہے کہ شہزادہ ہیری کی اہلیہ میگھن مرکل کی جانب سے شاہی عملے کے نامناسب رویے سے متعلق الزامات کی تحقیقاتی رپورٹ نہیں شائع کی جائے گی۔
خبر رساں ادارے اے ایف پی نے شاہی خاندان کے ایک سینیئر رکن کے حوالے سے کہا ہے کہ جمعرات کو سامنے آنے والی اس رپورٹ کی تفصیلات خفیہ رکھی جائیں گی۔ انہوں نے کہا کہ تحقیقات کے نتیجے میں تجاویز بھی مرتب کی گئیں جو رپورٹ کا حصہ ہیں اور ضرورت کے مطابق پالیسیوں اور طریقہ کار میں تبدیلی بھی کی گئی۔
خیال رہے کہ بکنگھم پیلس نے گزشتہ سال تحقیقات کا آغاز کیا تھا اور ڈچز آف سسیکس میگھن مرکل کے ساتھ کام کرنے کے تجربے کی بنیاد پر شاہی خاندان کے عملے کے بیانات بھی لیے گئے تھے۔
Advertisement
2021ء میں معروف امریکی ٹی وی شو کی میزبان اوپرا ونفری کو دیے گئے انٹرویو میں میگھن مرکل اور اُن کے شوہر شہزادہ ہیری نے کسی کا نام لیے بغیر شاہی خاندان کے اراکین پر نسل پرستی کا الزام لگایا تھا جس کے بعد سے شاہی جوڑے اور خاندان کے دیگر افراد کے درمیان تعلقات کشیدہ ہیں۔
تاہم شاہی زندگی سے دستبردار ہونے اور امریکا منتقل ہونے کے بعد بھی میگھن مرکل اور شہزادہ ہیری نے ملکہ برطانیہ کی پلاٹینم جوبلی کی تقریبات میں شرکت کی تھی۔
برطانوی شاہی محل کے ذرائع کا کہنا ہے کہ اگرچہ شہزادہ ہیری اور والد شہزادہ چارلس کے درمیان تعلقات کشیدہ ہیں لیکن ملکہ برطانیہ کی پلاٹینم جوبلی تقریبات کے موقع پر شہزادہ چارلس کی اپنی ایک سالہ پوتی للیبیٹ سے پہلی ملاقات بہت زیادہ جذباتی تھی۔