ایرانی بحریہ نے گزشتہ روز اعلان کیا ہے کہ وہ بحرہند میں اپنے ایک ڈرون ڈویژن کو اتارے گا۔
ایران کے سرکاری ٹی وی کے مطابق امریکی صدر جوبائیڈن کے دورہء اسرائیل کے دوران جس طرح ایرانی خطرے سے نمٹنے کی حمایت کی گئی ہے، یہ اقدام اسی تناظر میں کیا جا رہا ہے۔ تاہم ایرانی سرکاری ٹی وی کی اس رپورٹ میں یہ نہیں بتایا گیا ہے کہ کتنی کشتیاں یا جہاز ان ڈرونز سے لیس کی جارہی ہیں اور ان ڈرونز کی تعداد کیا ہو گی۔ البتہ یہ واضح ہے کہ ایک جہاز پر پچاس ڈرون ہو سکتے ہیں۔
پیر کے روز امریکی قومی سلامتی کے مشیر جیک سلیوان نے کہا تھا کہ واشنگٹن یہ یقین رکھتا ہے کہ ایران روس کے لیے یوکرین جنگ میں استعمال کی خاطر ڈرون تیار کر رہا ہے۔ یہ ڈرونز سینکڑوں کی تعداد ہوں گے۔ جیک سلیوان کے مطابق ان ڈرونز میں ایسے بھی ہوں گے جو اسلحہ بردار ہوں گے۔ مزید یہ کہ ان ڈرونز کے سلسلے میں ایران روسیوں کو تربیت دینے کی بھی تیاری کر رہا ہے۔ دوسری جانب ایرانی وزارت خارجہ نے امریکی سلامتی مشیر کے اس انکشاف کی تردید بھی نہیں کی تھی۔
Advertisement
اس ایرانی اعلان سے محض ایک روز قبل جوبائیڈن نے اپنے دورہ اسرائیل کے دوران اسرائیلی وزیراعظم یائر لیپڈ کے ساتھ ایک مشترکہ اعلامیے پر دستخط کیے ہیں جس میں کہا گیا ہے کہ دونوں ملک ایرانی جوہری ہتھیار برداشت نہیں کریں گے۔ اس موقع پر امریکی صدر سے پوچھا گیا کہ کیا وہ ایران کو جوہری ہتھیاروں کے حصول سے روکنے کے لیے بوقت ضرورت طاقت کے استعمال کے مؤقف پر قائم ہیں؟ تو صدر جو بائیڈن نے کہا کہ اگریہی آخری حل ہوا تو ان کا جواب ہاں میں ہے۔
ادھر ایرانی افواج کے ترجمان بریگیڈیئر جنرل ابوالفضل شکرچی نے کہا ہے کہ امریکی اور صہیونی اچھی طرح جانتے ہیں کہ ایران کے خلاف طاقت کے استعمال کی انہیں قیمت کیا ادا کرنا پڑے گی۔