– بول نیوز پاکستان جونیئر لیگ؛ پی ایس ایل کی بیشتر فرنچائزز ٹیمیں خریدنے سے پیچھے ہٹ گئیں

By admin On اگست 26, 2022

پاکستان جونیئر لیگ؛ پی ایس ایل کی بیشتر فرنچائزز ٹیمیں خریدنے سے پیچھے ہٹ گئیں

پی سی بی نے پاکستان جونیئر لیگ کے لیے ٹیموں کو 50 لاکھ ڈالر سے 70 لاکھ ڈالر میں فروخت کرنے کا منصوبہ بنایا ہے۔

نجی خبر رساں ادارے کے مطابق پاکستان جونیئر لیگ کی بیشتر فرنچائزز نے تجارتی دلچسی کے فقدان سے پریشان ہوکر ٹیموں کی بولی میں شرکت کا فیصلہ تبدیل کردیا ہے۔

دوسری جانب پاکستان کرکٹ بورڈ نے جونیئر لیگ کے لیے پی ایس ایل سے بہتر مالیاتی ماڈل تیار کیا ہے جب کہ ٹیموں کے مالکانہ حقوق 40 سال کے لیے دیے جائیں گے اور کچھ فیس بھی فرنچائزز کو واپس دے دی جائے گی۔

رپورٹ کے مطابق جو سب سے زیادہ مہنگی ٹیم خریدے گا، اسے سینٹرل کنٹریکٹ سے اتنے ہی زیادہ پیسے دیے جائیں گے لیکن تمام مالکان کو 3 لاکھ ڈالر ایڈوانس میں جمع کرانا ہوں گے۔

پاکستان جونیئر لیگ چیئرمین پی سی بی رمیز راجہ کا ڈریم پراجیکٹ ہے جس کا پہلا ایڈیشن اکتوبر میں کھیلا جائے گا۔ ٹائٹل اسپانسرشپ اور اسٹریمنگ رائٹس میں لگنے والی کم رقم کی بولیوں نے بورڈ کو تھوڑا پریشان کردیا ہے۔

ذرائع کے مطابق پی ایس ایل کی بیشتر ٹیمیں ریونیو کے حوالے سے غیر یقینی صورتحال کے باعث جونیئر لیگ کا حصہ بننے سے پیچھے ہٹ رہی ہیں۔

دلچسپ بات یہ ہے کہ سپر لیگ کی فرنچائزز فنانشل ماڈل میں تبدیلیاں چاہتی تھیں جو ابھی تک نہیں کی گئیں لیکن جونیئر لیگ کا ماڈل پی ایس ایل سے کہیں زیادہ بہتر ہے۔

ماڈل کے تحت فرنچائز فیس کا کچھ حصہ پی سی بی واپس کرے گا جس کو فرنچائز پول کہا جاتا ہے جب کہ اس میں 33 سے 50 فیصد رقم واپس کرنا ممکن ہوگی اور پی سی بی 10 فیصد ریونیو اپنے پاس رکھے گا۔

بقیہ 90 فیصد رقم فرنچائزز میں تقسیم کی جائے گی تاہم رقم سب سے زیادہ فیس ادا کرنے والے کے حساب سے دی جائے گی۔

ٹیموں کے مالکانہ حقوق بھی 40 سال کے لیے دیئے جائیں گے جب کہ 20 سال بعد معاہدے میں ترمیم کرکے فیس میں اضافہ کیا جائے گا۔