متحدہ عرب امارات کے سفیر،جناب حمد عبید ابراہیم سالم الزعابی نے آج وزیراعظم محمد شہباز شریف سے ملاقات کی
اسلام آباد(نیوزڈیسک)::وزیر اعظم شہباز شریف نے یو اے ای کے ساتھ پاکستان کے برادرانہ تعلقات کی اہمیت کا ذکر کرتے ہوئے متحدہ عرب امارات کے برادر عوام کی ترقی اور خوشحالی کے لیے نیک خواہشات کا اظہار کیا۔وزیراعظم نے پاکستان بھر میں حالیہ سیلاب سے ہونے والی تباہی اور سنگین صورتحال سے نمٹنے کے لیے حکومت کے اقدامات پر روشنی ڈالی۔ اس سلسلے میں وزیراعظم نے متحدہ عرب امارات کی جانب سے سیلاب سے متاثرہ افراد کے لیے فراہم کی جانے والی امداد اور اس حوالے سے فضائی راہداری کے قیام پر تشکرکااظہارکیا۔
وزیراعظم شہبازشریف نے مزید کہا کہ پاکستان متحدہ عرب امارات کے ساتھ مشترکہ مفاد کے تمام شعبوں میں اپنے تعلقات کو مزید گہرا کرنے کے لیے پرعزم ہے۔ انہوں نے مزید کہا کہ پاکستان اور متحدہ عرب امارات کے گزشتہ پانچ دہائیوں سے قریبی برادرانہ تعلقات ہیں جو مشترکہ اقدار اور ثقافت سے جڑے ہوئے ہیں۔ متحدہ عرب امارات مشرق وسطیٰ میں پاکستان کا سب سے بڑا تجارتی شراکت دار اور سرمایہ کاری کا ایک بڑا ذریعہ ہے۔
