شاہین آفریدی نے افغان بلے باز کو اسپتال پہنچادیا

By admin On اکتوبر 19, 2022

قومی ٹیم کے فاسٹ بولر شاہین آفریدی نے ٹی ٹوئنٹی ورلڈکپ کے وارم اپ میچ میں افغان بلے باز رحمان اللہ گرباز کو یارکر مارکر اسپتال پہنچادیا ہے۔

پاکستان کرکٹ ٹیم کے بائیں ہاتھ کے فاسٹ بولر شاہین آفریدی انجری کے بعد دوبارہ فارم میں نظر آرہے ہیں، انہوں نے آج افغانستان کے خلاف وارم اپ میچ میں بھی شاندار افتتاحی اسپیل کیا۔

شاہین آفریدی نے اپنے پہلے دو اوورز میں افغانستان کے اوپنرز رحمان اللہ گرباز اور حضرت اللہ ززئی کو تیز گیندوں کے ذریعے بیک فٹ پر کردیا تھا۔

شاہین آفریدی نے بولنگ کرواتے ہوئے ایک یارکر کروائی جو رحمان اللہ گرباز کے پاؤں پر جالگی جس کے بعد وہ شدید تکلیف میں دکھائی دیے جب کہ امپائر نے انہیں آؤٹ قرار دیا۔

زخمی کھلاڑی کے علاج کے لیے باہر سے فزیو کو بلوایا گیا تاہم گرباز کو چلنے میں مشکل درپیش تھی جس کے باعث انہیں متبادل فیلڈر میدان سے باہر لے کر گئے۔

تازہ ترین اطلاعات کے مطابق گرباز کو بائیں پاؤں کے اسکین کے لیے قریبی اسپتال لے جایا گیا ہے جس کے بعد ان کی انجری کے حوالے سے اپڈیٹ دی جائے گی۔

واضح رہے کہ افغانستان اپنا سپر 12 مرحلے کا پہلا میچ ہفتے کو انگلینڈ کے خلاف پرتھ میں کھیلے گا۔

اگر آج کے میچ کی بات کریں تو افغانستان نے پاکستان کے خلاف پہلے بیٹنگ کرتے ہوئے 6 وکٹوں کے نقصان پر 154 رنز اسکور کیے تھے۔

اس میچ میں شاہین آفریدی اور حارث رؤف نے 2،2 وکٹیں حاصل کیں تھیں جب کہ افغان کپتان محمد نبی نے 51، ابراہیم زدران نے 35 اور عثمان غنی نے 32 رنز اسکور کیے تھے۔

ہدف کے تعاقب میں پاکستانی اوپنرز نے 2.2 اوورز میں 19 رنز بنائے جس کے بعد مسلسل بارش کی وجہ سے میچ کو ختم کردیا گیا۔