بھارتی اداکارہ سے انسٹاگرام پر لائیو گفتگو کے دوران مداح کی والدہ سے پٹائی لگ گئی۔
اداکار و سوشل میڈیا انفلوئینسر اکثر اوقات لائیو آکر اپنے مداحوں سے بات کرتے رہتے ہیں، جس پر انہیں کبھی کبھار عجیب صورت حال کا سامنا بھی کرنا پڑجاتا ہے۔
ایسا ہی ایک واقعہ بھارتی اداکارہ اونیت کور کے ساتھ کچھ عرصہ پہلے پیش آیا تھا، جس کی ویڈیو سوشل میڈیا پر دوبارہ وائرل ہوگئی ہے۔
ہوا کچھ یوں کہ فوٹوز اینڈ ویڈیوز شیئرنگ ایپ انسٹاگرام پر بھارتی اداکارہ اپنے مداحوں سے لائیو گفتگو کر رہی تھیں، کہ اس دوران انہیں ایک عجیب صورت حال کا سامنا کرنا پڑگیا۔
وائرل ویڈیو میں دیکھا جاسکتا ہے کہ اداکارہ انسٹاگرام پر اپنے مداحوں سے لائیو گفتگو کر رہی ہیں، اور اس دوران ایک مداح کو اپنے ساتھ لائیو لے لیتی ہیں، گفتگو کرنے کے بعد اونیت مداح کا شکریہ ادا کرتی ہیں اور اسے اپنا خیال رکھنے کا کہتی ہیں کہ اس دوران مداح کی والدہ غصے میں بھپری ہوئی اس کے پیچھے آجاتی ہیں اور فوراً ہی اس کی پٹائی کرنا شروع کردیتی ہیں۔
صرف یہی نہیں بلکہ وہ اپنے بیٹے سے پوچھنا شروع کردیتی ہیں کہ یہ لڑکی کون ہے؟
لڑکے کی والدہ یہ سمجھ رہی ہوتی ہیں کہ وہ اپنی گرل فرینڈ سے بات کر رہا ہے، تب ہی اس کی پٹائی لگانا شروع کردیتی ہیں جبکہ اس دوران اداکارہ پریشان ہونے کے ساتھ ساتھ مسکراتی ہوئی بھی نظر آرہی ہیں۔
انسٹاگرام پر لائیو گفتگو کے دوران یہ پورا منظر ویڈیو میں محفوظ ہوجاتا ہے جو سوشل میڈیا پر وائرل ہوچکا ہے اور صارفین کی جانب سے اس پر دلچسپ تبصروں کا سلسلہ جاری ہے۔
اداکارہ اونیت کور نے اپنے فنی کیریئر کا آغاز سال 2012 سے ایک ٹی وی سیریل میری ماں سے کیا تھا، جس کے بعد وہ مختلف ٹی وی شوز اور فلموں میں بھی کام کرچکی ہیں۔