ابوظہبی میں بین الاقوامی دفاعی نمائش آیئڈیکس اور نیول نمائش نیوڈیکس کاآغاز
نائب وزیراعظم شیخ منصور بن زاید نے بین الاقوامی دفاعی نمائش کا افتتاح کیا
ولی عہد ابوظہبی شیخ محمد بن زاید کا عالمی دفاعی نمائش میں مختلف پویلینز کا دورہ
چئیرمین جوائنٹ چیف آف اسٹاف کمیٹی پاکستان جنرل ندیم رضا کی خصوصی شرکت
ابوظہبی (چوہدری ارشد)::صدرمتحدہ عرب امارات عزت مآب شیخ خلیفہ بن زاید النھیان کی سرپرستی میں بین الاقوامی دفاعی نمائش و کانفرنس آیڈیکس اور نیول ڈیفنس اینڈ میری ٹائم کی نمائش نیوڈیکس کا ابوظہبی نیشنل ایگزیبشن سینٹر میں آغاز ہوگیا جس میں 9 سو سے زائد کمپنیاں شریک ہیں – رواں سال کے ان ایونٹس میں پانچ نئے ممالک ان میں شرکت کررہے ہیں جن میں اسرائیل ، لکمسبرگ ، پرتگال ، آذربائیجان اور شمالی مقدونیہ شامل ہیں ۔ دونوں دفاعی نمائشیں 25 فروری تک جاری رہیں گی۔ آیڈیکس اور نیوڈیکس 2021 میں دفاعی شعبہ کی نئی ایجادات اورتازہ ترین پیشرفت پیش کی جارہی ہیں ۔ان میں جدید ترین فوجی ٹیکنالوجی ، تخلیقی آلات اور قومی دفاعی شعبہ میں ہونے والی ترقی شامل ہیں ۔ ان نمائشوں میں شریک متعلقہ شعبہ کے ماہر اداروں اور بڑی عالمی کمپنیوں کے درمیان نئی شراکت داریاں بھی قائم ہونگیں – ان میں شریک ہونے والوں کو عالمی امن میں معاونت کیلئے ہونے والی نئی تکنیکی پیشرفت کو جاننے اور سمجھنے کا موقع بھی ملے گا۔نائب وزیر اعظم اور صدارتی امور کے وزیر شیخ منصور بن زاید آل نھیان نے ولی عہدابوظہبی و ڈپٹی سپریم کمانڈرمسلح افواج متحدہ عرب امارات عزت مآب شیخ محمد بن زاید آل نھیان کی طرف سے پندرہویں نمائش کاافتتاح کیا۔ نیول ڈیفنس اور میری ٹائم سیکورٹی نمائش بھی اس نمائش کے ساتھ جاری ہے۔ افتتاحی تقریب سے خطاب میں شیخ منصور بن زاید آل نھیان نے کہا کہ آئیڈیکس ایک ممتاز عالمی نمائش ہے جس میں جدید ترین فوجی سازوسامان، جدید اسلحہ سازی اور جنگی ٹیکنالوجی کا مظاہرہ کیا گیا ہے۔ یہ تمام ممالک اور بڑی کمپنیوں کے لئے علاقائی اور بین الاقوامی موقع پیش کرتا ہے جواس اسٹریٹجک فیلڈ میں کام کرتے ہیں۔ انھوں نے کہا کہ اس وقت پر اس عالمی نمائش کا انعقاد یہ ظاہر کرتا ہے کہ متحدہ عرب امارات بین الاقوامی ایونٹس کی میزبانی کے لئے کس طرح مکمل طور پر تیار ہے۔ انھوں نے کہا کہ اس نمائش کی میزبانی کے لئے ہماری قوم کی تیاری کو ہماری دانشمندانہ قیادت کی حیرت انگیز رہنمائی اور وژن نے قابل بنایا ہے۔ متحدہ عرب امارات کے قومی ترانے کے ساتھ شروع ہونے والی اس افتتاحی تقریب میں متحدہ عرب امارات کے غیر معمولی کارناموں کے نمایاں ہونے کے ساتھ ساتھ تیز رفتار ترقی اور عالمی قیادت پر روشنی ڈالی گئی ۔ تقریب میں فوجی پریڈ اور میوزیکل پرفارمنس بھی شامل تھی ۔ دیگر سرگرمیوں میں فرضی مشقیں، زمینی، فضائی اور بحری افواج کی کارروائیوں کا مظاہرہ شامل تھا۔ مشقوں کے دوران دفاعی تدبیر کرنے والی ٹیکنالوجی کا مظاہرہ پیش کیا گیا جس میں جدید ترین مصنوعی ذہانت، روبوٹیکس اور سیٹلائٹ رابطوں کا استعمال کیا گیا۔ افتتاحی تقریب میں دفاعی امور کے وزیر مملکت محمد بن احمد الباوردی اور متحدہ عرب امارات کی مسلح افواج کے چیف آف اسٹاف لیفٹیننٹ جنرل حماد محمد ثانی الرمیثی نے متعدد سینئر کمانڈروں کے ہمراہ شرکت کی۔ ابو ظبی قومی نمائش کمپنی (ایڈنک ) کے زیر اہتمام دونوں دفاعی نمائشوں کا اہتمام وزارت دفاع اور متحدہ عرب امارات کی مسلح افواج کی جنرل کمانڈ کے تعاون سے کیا گیا ہے۔ ان تقاریب میں متحدہ عرب امارات کے سیکورٹی کے شعبے میں وسیع پیمانے پر ترقی کی حمایت کے ساتھ عالمی کارپوریٹ سیکورٹی میں اضافے کے لئے نئے مواقع کی پیش کش کے ساتھ عالمی دفاعی شعبے میں جدید ٹیکنالوجی اور نئی ایجادات کی نمائش کی گئی ہے۔ اس سال آئیڈیکس اور نیوڈیکس کا ایڈیشن ابوظبی میں آن سائٹ کا سب سے بڑا ایونٹ ہے جو وباء سے بحالی کے بعد منعقد کیا گیا ہے۔ اس پروگرام میں 59 ممالک کے 900 نمائش کنندگان شریک ہیں ۔ اس میں 70 ہزار سے زاید سیاح اور 110 بین الاقوامی وفود شرکت کررہے ہیں۔ دونوں نمائشوں میں 64 ممالک کے 500 سے زیادہ صحافی بھی شامل ہیں۔ افتتاحی تقریب سے خطاب کرتے ہوئے کے لئے اعلیٰ تنظیمی کمیٹی کے چیئرمین میجر جنرل اسٹاف پائلٹ فارس خلف المزروئی نے کہا کہ اس عالمی ایونٹ کا افتتاح ہمارے لئے بے حد فخر کا لمحہ ہے۔ دونوں عالمی نمائشیں ہمارے ملک کی گولڈن جوبلی کے موقع پر ہورہی ہیں ۔ انھوں نے کہا کہ یہ نمائشیں عالمی پلیٹ فارم کی حیثیت سے اپنی اسٹریٹجک حیثیت کو مستحکم کررہی ہیں۔ انھوں نے کہا کہ اس سے ثابت ہوتا ہے کہ ہمارا ملک بین الاقوامی ایونٹس کی میزبانی کرنے کے لئے پوری طرح تیارہے۔ انہوں نے کہا کہ IDEX اور NAVDEX موجودہ مشکل عالمی حالات کے باوجود عالمی سطح پر دفاعی شعبے کی ترقی جاری رکھے ہوئے ہیں اور ان میں نمایاں بین الاقوامی شرکت قابل ستائش ہے۔ وزارت دفاع میں ایگزیکٹو ڈائریکٹوریٹ آف انڈسٹریز اینڈ ڈویلپمنٹ ڈیفنس کی صلاحیتوں کے سربراہ اور آئی ڈی ای ایکس اور این اے وی ڈی ای ایکس کے لئے اعلیٰ تنظیم سازی کمیٹی کے وائس چیئرمین میجر جنرل پائلٹ اسٹاف پائلٹ اسحاق صالح البلوشی نے کہا کہ یہ نمائشیں ہمارے ملک کی مستحکم ترقی کی عکاس ہیں۔ انھوں نے کہا کہ ان نمائشوں کے ذریعے ہم مسابقتی قومی معیشت کی تعمیر، علم اور جدت میں مدد کرتے ہیں ۔ ابوظبی قومی نمائش کمپنی کے منیجنگ ڈائریکٹر اور گروپ سی ای او حمید مطر الظہری نے کہاکہ ہمیں اس غیر معمولی تقریب کا اہتمام کرنے پر فخر ہے۔ ہم نے رجسٹریشن، آمد اور تقریب میں شرکت کے بارے میں جامع طریقہ کار وضع کیا۔احتیاطی تدابیر پر عمل درآمدکویقینی بنایاگیاہے اور ایس اوپیزکاخصوصی خیال رکھاگیاہے۔