کراچی میں ضلع وسطی کے علاقے سمن آباد میں غیر قانونی تجاوزات کے خلاف آپریشن کے دوران مشتعل افراد نے انتظامیہ پر حملہ کردیا۔
پولیس کے مطابق ضلعی انتظامیہ نے سمن آباد میں تجاوزات کے خلاف کارروائی کی جس پر ہوٹل مالکان اور ان کے کارندوں نے انتظامیہ کے اہلکاروں پر حملہ کرکے انہیں زدوکوب کیا۔
پولیس کا کہنا ہے کہ واقعے میں پولیس اور ٹاؤن میونسپل انتظامیہ کے بعض اہلکار زخمی ہوئے جبکہ زخمی ہونے والوں میں ایس ایچ او تھانہ حیدری عدیل بھی شامل ہیں۔
تجاوزات کے خلاف آپریشن کے بعد مشتعل افراد نے احتجاج بھی کیا جس کے باعث شفیق موڑ پر ٹریفک کی روانی متاثر ہوئی۔