امریکی صدر ڈونلڈ ٹرمپ نے ایران کے خلاف جنگ میں کامیابی کا دعویٰ کرتے ہوئے کہا ہے کہ امریکا اس وقت جنگ جیتنے کے مراحل میں ہے اور وہ جب چاہیں ایران کے خلاف جنگ جیت سکتے ہیں، ضرورت پڑنے پر فوری فوجی کارروائی سے بھی گریز نہیں کریں گے۔
ایک ٹی وی انٹرویو میں صدر ٹرمپ نے دعویٰ کیا کہ امریکا نے ایران کو بالکل بے اثر کردیا ہے، ایرانی معیشت تباہ ہوچکی ہے، مہنگائی 301 فیصد تک پہنچ گئی ہے اور ایرانی فوجیوں کو تنخواہیں بھی ادا نہیں کی جارہیں۔
ان کا کہنا تھا کہ ایران کے خلاف طاقت استعمال کرنے میں انہیں کوئی ہچکچاہٹ نہیں ہوگی۔
ٹرمپ نے مزید کہا کہ وہ کیوبا کے خلاف مختصر فوجی کارروائی پر بھی غور کرسکتے ہیں اور صدارت چھوڑنے سے پہلے کیوبا کا معاملہ حل کرنا چاہتے ہیں۔
امریکی صدر نے اسرائیل میں اپنی مقبولیت 99 فیصد ہونے کا دعویٰ کرتے ہوئے کہا کہ وہ اسرائیل جاکر وزیراعظم بھی بن سکتے ہیں۔
دوسری جانب ٹرمپ نے امریکی نائب صدر جے ڈی وینس کو ہدایت کی ہے کہ وہ اپنی تمام تر توجہ ڈیموکریٹس کے زیرانتظام شہروں اور ریاستوں میں مبینہ جرائم اور بدعنوانی کے معاملات پر مرکوز کریں۔