کامران اکمل نے خود کو قومی ٹیم کے لیے ان فٹ قرار دے دیا

By admin On اگست 1, 2022

طویل عرصے قومی ٹیم سے باہر رہنے والے وکٹ کیپر و بیٹر کامران اکمل نے خود کو قومی ٹیم کے لیے ان فٹ قرار دے دیا ہے۔

کامران اکمل نے میڈیا سے گفتگو کرتے ہوئے یہ اعتراف کیا ہے کہ اب ان کی ٹیم میں کوئی جگہ نہیں ہے، خاص کر محمد رضوان، سرفراز احمد اور اعظم خان جیسے دیگر کھلاڑیوں کی موجودگی میں۔

میڈیا سے گفتگو میں انہوں نے ٹی ٹوئنٹی ورلڈ کپ کے اسکواڈ پر تنقید کرتے ہوئے کہا کہ ورلڈ کپ کے لیے قومی ٹیم کا انتخاب دوستی کی بنیاد پر نہیں ہونا چاہیے بلکہ میرٹ اور آسٹریلیا کی کنڈیشنز کو مدنظر رکھ کر ہونا چاہیے۔

انہوں نے کہا کہ میں قومی کرکٹ ٹیم کے ٹی ٹوئنٹی ورلڈ کپ کے اسکواڈ میں جگہ نہیں بناسکا تاہم ان کا کہنا تھا کہ وہ ٹی ٹوئنٹی انٹرنیشنل میں شاندار رہے ہیں اور کوئی بھی ان کی جگہ نہیں لے سکتا ہے۔

کامران اکمل نے ساتھی وکٹ کیپر محمد رضوان کی بھی تعریف کی ہے جن کی کارکردگی مختصر ترین کرکٹ فارمیٹ میں ناقابل یقین رہی ہے۔

واضح رہے کہ کامران اکمل اگرچہ کافی عرصہ سے قومی ٹیم کا حصہ نہیں ہیں لیکن اس دوران وہ دنیا بھر کے ٹی ٹوئنٹی مقابلوں میں باقاعدگی سے شرکت کرتے رہے ہیں۔

انہیں حال ہی میں کشمیر پریمیئر لیگ کے دوسرے ایڈیشن کے لیے باغ اسٹالینز کی جانب سے آئیکون پلیئر نامزد کیا گیا ہے جبکہ کرکٹ شائقین بھی کے پی ایل کو لے کر بہت پرجوش ہیں۔

کشمیر پریمیئر لیگ کے حوالے سے بات کرتے ہوئے وکٹ کیپر کا کہنا تھا کہ ٹورنامنٹ کے معیار کو بہتر بنانے کے لیے ہمیں ٹورنامنٹ میں اچھی کرکٹ کھیلنی ہوگی۔

انہوں نے کہا کہ کے پی ایل مقامی نوجوان کھلاڑیوں کے لیے خود کو ثابت کرنے کا ایک بہترین موقع ہے اور نوجوان کھلاڑیوں کو سینئر کھلاڑیوں سے تجربہ حاصل کرنا چاہیے۔

یاد رہے کہ کشمیر پریمیئر لیگ کا دوسرا ایڈیشن 11 اگست سے شروع ہونے جارہا ہے جس کے میچز 25 اگست تک جاری رہیں گے جبکہ تمام میچز مظفر آباد کرکٹ اسٹیڈیم میں کھیلے جائیں گے۔