پاکستان بزنس پروفیشنل کونسل ابوظہبی نے یوم پاکستان کے موقع پرتقریب کاانعقادکیا
تقریب میں پاکستان اور یواے ای کی سلامتی اورتحفظ کی دعاکی گئی اورکیک کاٹاگیا۔
ابوظہبی(اردوویکلی)::پاکستان کے 86ویں قومی دن 23مارچ کی مناسبت سے پاکستان بزنس پروفیشنل کونسل ابوظہبی نے یوم پاکستان کی یاد میں پی بی پی سی ابوظہبی آفس میں کیک کاٹنے کی تقریب کا انعقاد کیاگیا، جس میں بانی اراکین، ایگزیکٹو بورڈ کے اراکین، کونسل کے اراکین اور مہمانوں نے نہائت جوش وجذبہ کے ساتھ شرکت کی ۔
تقریب کا آغاز چیئرمین ڈاکٹر ایس قیصر انیس کے خیر مقدمی خطاب سے ہوا، جنہوں نے یوم پاکستان کی اہمیت پر روشنی ڈالی اور متحدہ عرب امارات میں پاکستانی کمیونٹی کے اتحاد اور لگن کو سراہا۔ انہوں نے بانی اراکین کو ان کے وژن اور کونسل کے مشن کے لیے دیرینہ وابستگی کا بھی اعتراف کیا۔
صدر محمداقبال نسیم نے خطاب کرتے ہوئے پیشہ ورانہ اور کاروباری تعلقات کو مضبوط بنانے، کمیونٹی کی شمولیت کی حمایت اور متحدہ عرب امارات اور پاکستان کے درمیان تعمیری تعاون کو فروغ دینے کے لیے کونسل کی جاری کوششوں پر روشنی ڈالی۔
کونسل کے بانی رکن ڈاکٹرعبدالہادی شاہد نے بھی کونسل کے ابتدائی سفر اور اس کی ترقی کو شکل دینے والی اجتماعی کوششوں پر تبصرہ کیا۔
تقریب کے دوران خطے بھر کے لوگوں کی سلامتی اور تحفظ کے لیے دعا مانگی گئی۔ شرکاء نے علاقائی استحکام کو متاثر کرنے والی حالیہ پیش رفت کے پرامن حل کی امید کا اظہار کیا۔ کونسل کی جانب سے حالیہ امن، مذاکرات اور تعاون کی حمایت کے لیے پاکستان کے دیرینہ عزم کا اعادہ کیاگیا ۔
