وفاقی وزیرِ خزانہ و ریونیو سینیٹر محمد اورنگزیب کا کہناہے کہ پاکستان کی معیشت درست سمت میں گامزن ہے پائیدار ترقی اور سرمایہ کاری میں نجی شعبہ قائدانہ کردار ادا کرے گا۔
ان خیالات کا اظہار انہوں نے جمعرات کو اوورسیز انویسٹرز چیمبر آف کامرس اینڈ انڈسٹری میں خطاب کرتے ہوئے کیا۔ وفاقی وزیرِ خزانہ و محصولات، سینیٹر محمد اورنگزیب نے اوورسیز انویسٹرز چیمبر آف کامرس اینڈ انڈسٹری (او آئی سی سی آئی) کے دورے کے دوران کہا کہ پاکستان کی معیشت درست سمت میں گامزن ہے۔
انہوں نے زور دیا کہ پائیدار معاشی ترقی کی قیادت نجی شعبے کو کرنا ہوگی جبکہ حکومت سازگار کاروباری ماحول، پالیسی فریم ورک اور سرمایہ کاری کے لیے مؤثر ماحول فراہم کرتی رہے گی۔
وزیرِ خزانہ نے حکومت کی چھ اقتصادی ترجیحات کا خاکہ پیش کیا میکرو اکنامک استحکام کو مستقل بنیادوں پر مضبوط بنانا اور مالیاتی و بیرونی شعبے میں پائیدار استحکام اور معاشی جھٹکوں کو برداشت کرنے کی صلاحیت میں اضافہ کرنا، استحکام سے پیداواریت، سرمایہ کاری، برآمدات اور روزگار پر مبنی پائیدار، جامع اور ذمہ دارانہ ترقی کی جانب بڑھنا،مسلسل، قابلِ اعتماد اور عملدرآمد پر مبنی ساختی اصلاحات جاری رکھنا؛ پاکستان کے عالمی معاشی روابط کو امداد سے تجارت، سرمایہ کاری اور نجی سرمائے کے بہاؤ کی جانب منتقل کرنا؛ ایس ایم ایز، زراعت، ہاؤسنگ اور مالی سہولیات تک محدود رسائی رکھنے والے طبقات کے لیے فنانس تک رسائی کو وسعت دینا؛ اور ڈیجیٹلائزیشن، بلاک چین، ویب 3.0 اور ابھرتی ہوئی ٹیکنالوجیز سے استفادہ کرتے ہوئے پاکستان کو نئی معیشت کے لیے تیار کرنا۔
او آئی سی سی آئی کے اراکین اور اسٹیک ہولڈرز سے خطاب کرتے ہوئے سینیٹر محمد اورنگزیب نے کہا کہ پاکستان کی معیشت ایک مشکل دور، معاشی سکڑاؤ اور استحکام کے مرحلے سے نکل کر ترقی کی جانب بڑھی ہے۔
انہوں نے کہا کہ تین سال پہلے ملک کی معیشت سکڑ گئی تھی۔ آج ہم استحکام سے ترقی کی جانب منتقل ہو چکے ہیں، اور ہمیں اس بات کو یقینی بنانا ہے کہ یہ ترقی پائیدار رہے۔ انہوں نے حاصل ہونے والے معاشی استحکام کو مزید مضبوط بنانے، اسے مستقل بنیادوں پر برقرار رکھنے اور بوم اینڈ بسٹ سائیکل سے نکلنے کی ضرورت پر زور دیا۔
وزیر خزانہ کے مطابق ترقی کا انحصار تیزی سے پیداواریت، سرمایہ کاری، برآمدات اور روزگار پر ہونا چاہیے، بجائے اس کے کہ عارضی لیکویڈیٹی اور کھپت پر مبنی توسیع پر انحصار کیا جائے، مقامی سرمایہ کاری اور سرمائے کی تشکیل کی اہمیت اجاگر کرتے ہوئے وزیرِ خزانہ نے پی آئی اے ٹرانزیکشن کا حوالہ دیا، جہاں پاکستان کے بڑے کاروباری گروپس نے باہمی تعاون کے ذریعے مجموعی طور پر تقریباً 1.2 ارب امریکی ڈالر متحرک کرنے کی صلاحیت کا مظاہرہ کیا۔
انہوں نے کہا کہ اس طرح کی شراکت بڑے پیمانے پر سرمایہ کاری کے مواقع سے فائدہ اٹھانے اور بڑے منصوبوں کے لیے مقامی سرمایہ کاروں کی بڑھتی ہوئی صلاحیت کی عکاسی کرتی ہے۔ وزیرِ خزانہ نے کہا کہ حکومت کا کام کاروبار دوست اور سازگار ماحول فراہم کرنا ہے، معاشی ترقی کی قیادت نجی شعبے کو کرنا ہوگی انہوں نے مزید کہا کہ حکومت مطلوبہ پالیسی فریم ورک، ریگولیٹری سہولت کاری اور سرمایہ کاری کے لیے سازگار ماحول فراہم کرتی رہے گی جس میں یو ایس ایکسِم بینک، دیگر ایکسپورٹ کریڈٹ ایجنسیوں اور بین الاقوامی شراکت داروں کے ساتھ روابط، نیز ٹیرف سے متعلق بات چیت اور مذاکرات شامل ہیں۔
غیر ملکی سرمایہ کاری کے حوالے سے سینیٹر محمد اورنگزیب نے کہا کہ پاکستان میں مزید بین الاقوامی سرمایہ کاری راغب کرنے کے لیے اقدامات کیے جا رہے ہیں۔ انہوں نے کان کنی اور معدنیات، ٹیکنالوجی، زراعت، تیل و گیس، ریفائنری اپ گریڈز اور دیگر شعبوں میں سرمایہ کاروں کی بڑھتی ہوئی دلچسپی کو اجاگر کیاانہوں نے بجلی کی تقسیم کار کمپنیوں کی نجکاری میں ترک سرمایہ کاروں کی دلچسپی کے ساتھ ساتھ مختلف شعبوں میں سعودی عرب اور دیگر بین الاقوامی سرمایہ کاروں کی بڑھتی ہوئی دلچسپی کا بھی ذکر کیا۔
انہوں نے زور دیا کہ غیر ملکی سرمایہ کاری کو عملی شکل اختیار کرنے میں وقت لگتا ہے اور اس کے لیے پالیسی کا تسلسل، مؤثر سہولت کاری اور سرمایہ کاری کے لیے سازگار ماحول ضروری ہے۔
حکومت کے ساختی اصلاحات کے ایجنڈے کو اجاگر کرتے ہوئے وزیرِ خزانہ نے کہا کہ اصلاحات اب ڈیزائن کے مرحلے سے آگے بڑھ کر عملدرآمد کے مرحلے میں داخل ہو چکی ہیں، جن میں ٹیکس، توانائی، سرکاری ملکیتی ادارے، نجکاری اور عوامی مالیات شامل ہیں۔
انہوں نے بتایا کہ ٹیکس فائلرز کی تعداد 57 لاکھ سے تجاوز کر چکی ہے، جبکہ گزشتہ سال یہ تعداد تقریباً 39 لاکھ اور 2022 میں تقریباً 18 سے 19 لاکھ تھی۔ انہوں نے کہا کہ ٹیکس دہندگان کو سہولت فراہم کرنے اور ان کے اعتماد میں اضافے کی کوششوں کے ساتھ محصولات میں اضافے کا عمل بھی جاری رہے گاجبکہ ٹیکس انتظامیہ کو مضبوط بنانے میں ڈیجیٹلائزیشن اور ڈیٹا کا کردار مزید بڑھایا جائے گا۔
انہوں نے زور دیا کہ مؤثر محصولات کی وصولی مالیاتی استحکام برقرار رکھنے اور پیداواری سرمایہ کاری کے لیے مزید گنجائش پیدا کرنے کے لیے ضروری ہےفنانس تک رسائی کے حوالے سے سینیٹر محمد اورنگزیب نے ایس ایم ایز، زراعت، ہاؤسنگ اور مالی سہولیات تک محدود رسائی رکھنے والے طبقات کے لیے فنانسنگ کے مواقع بڑھانے کی کوششوں کو اجاگر کیا۔
وزیراعظم کے اپنا گھر پروگرام کا حوالہ دیتے ہوئے انہوں نے کہا کہ تقریباً 60 ارب روپے کی فنانسنگ پہلے ہی فراہم کی جا چکی ہےجبکہ بینکوں نے مزید خاطر خواہ فنانسنگ کی منظوری دی ہے۔
انہوں نے کہا کہ چیلنج اب فنانسنگ کی دستیابی سے آگے بڑھ کر ہاؤسنگ کی فراہمی میں اضافے اور اس بات کو یقینی بنانے کی جانب منتقل ہو رہا ہے کہ دستیاب فنانسنگ تعمیرات، سرمایہ کاری، روزگار اور وسیع تر معاشی سرگرمی میں تبدیل ہو۔
وزیرِ خزانہ نے پاکستان کی کیپیٹل مارکیٹس کو مزید وسعت اور گہرائی دینے کی ضرورت پر بھی زور دیا تاکہ ملکی بچت کو زیادہ مؤثر انداز میں پیداواری سرمایہ کاری کی جانب منتقل کیا جا سکے، جس میں انفراسٹرکچر، ہاؤسنگ، نجکاری اور نجی شعبے کی توسیع شامل ہے۔
انہوں نے کہا کہ حکومت کیپیٹل مارکیٹ کے وسیع تر نظام کو مضبوط بنانے اور سرمائے کی تشکیل اور سرمایہ کاری کے لیے مزید مواقع پیدا کرنے پر کام کر رہی ہے۔ انہوں نے پاکستان کے دوطرفہ معاشی تعلقات کو امداد سے تجارت اور سرمایہ کاری کی جانب منتقل کرنے اور ملک کو نئی معیشت کے لیے تیار کرنے کے حکومتی مقصد کا اعادہ کیا۔
وزیر خزانہ نے ڈیجیٹلائزیشن، بلاک چین، ویب 3.0 اور ابھرتی ہوئی ٹیکنالوجیز میں موجود مواقع کو اجاگر کرتے ہوئے کہا کہ ان شعبوں میں سرمایہ کاری، جدت، برآمدات اور روزگار کے فروغ کی بھرپور صلاحیت موجود ہے۔
ملاقات کے دوران او آئی سی سی آئی کے نمائندگان نے کاروباری اور سرمایہ کاری کے ماحول کے حوالے سے اپنے نقطۂ نظر کا اظہار کیا اور بین الاقوامی سرمایہ کاروں کی زیادہ سے زیادہ شرکت کے مواقع پر تبادلہ خیال کیااجلاس میں کاروباری ماحول کو مزید بہتر بنانے، سرمایہ کاری میں سہولت فراہم کرنے اور نجی شعبے کی قیادت میں معاشی ترقی کو مضبوط بنانے کے اقدامات پر بھی گفتگو ہوئی۔
سینیٹر محمد اورنگزیب نے کہا کہ پاکستان کی معاشی سمت کا انحصار بتدریج نجی شعبے کی سرمایہ کاری، جدت، روزگار کے مواقع پیدا کرنے اور پیداواری صلاحیت میں اضافے پر ہوگا جبکہ حکومت پالیسی کے تسلسل، سہولت کاری اور مضبوط معاشی نظم و نسق پر توجہ مرکوز رکھے گی۔
انہوں نے میکرو اکنامک استحکام کو مستقل بنیادوں پر مضبوط بنانے، سرمایہ کاروں کے اعتماد کو مستحکم کرنے اور پائیدار، جامع اور نجی شعبے کی قیادت میں ترقی کے لیے سازگار ماحول پیدا کرنے کے حکومتی عزم کا اعادہ کیا۔