برطانوی شہریوں کو برطانوی تاریخ کے گرم ترین دنوں کا سامنا ہے۔ برطانوی محکمہ موسمیات نے درجہ حرارت 40 ڈگری سینٹی گریڈ تک پہنچنے کی پیشنگوئی کی ہے۔
برطانوی حکومت نے درجہ حرارت میں اضافے کی پیشنگوئی کے بعد نیشنل ایمرجنسی کا اعلان کیا ہوا ہے۔
حکومتی ترجمان کے مطابق اگلے 48 گھنٹے مشکل ہوں گے۔
بدترین موسمیاتی تبدیلی کے سبب برطانیہ کی تاریخ میں پہلی بار ہے کہ جب درجہ حرارت چالیس ڈگری سے تجاوز کر جائے گا۔ اس پیشنگوئی کے بعد ٹرین کمپنیوں نے مختلف مقامات پر سروسز کو معطل کردیا ہے۔تعلیمی اداروں کو جلد بند کردیا گیا جبکہ وزرا کی جانب سے عوام سے گھروں میں رہنے کی درخواست کی گئی ہے۔
یاد رہے کہ یورپ کے بیشتر حصوں میں ہیٹ ویوز کی وجہ سے درجہ حرارت 40 سے 50 ڈگری کے درمیان پہنچ چکا ہے جبکہ پرتگال، اسپین اور فرانس میں جنگلات کو آگ لگی ہوئی ہے۔
Advertisement
دوسری جانب، لندن کے میٹرو نیٹ ورک میں 18 اور 19 جولائی کو عارضی طور پر مختلف پابندیاں لگائی گئی ہیں جس کے دوران کم ٹرینیں چلائی جائیں گی۔
نیشنل ریل نیٹ ورک نے مسافروں پر زور دیا ہے کہ بہت ضروری ہو تو ہی سفر کریں، ورنہ گھر میں قیام کریں۔حکومت نے تعلیمی اداروں کو کھلا رکھنے کا اعلان کیا تھا تاہم، بیشتر تعلیمی ادارے وقت سے قبل بند کردیے گئے۔ کھیلوں کے ایونٹ بھی منسوخ کردیے گئے ہیں۔ ہیٹ ویو کے باعث چیسٹر کے چڑیا گھر کو دو دن کے لیے بند کردیا گیا ہے جبکہ لندن کے چڑیا گھر میں جانوروں کو ٹھنڈی جگہوں پر منتقل کردیا گیا ہے۔
یوکے ہیلتھ سکیورٹی ایجنسی نے برطانیہ کے لیے 18 اور 19 جولائی کے لیے درجہ حرارت کی لیول 4 وارننگ جاری کی ہے۔
محکمہ موسمیات نے خبردار کیا ہے کہ شدید گرمی سے حرارت کے حوالے سے حساس آلات اور سسٹمز فیل ہونے کا خطرہ ہے جس سے بجلی، پانی یا موبائل فون سروسز معطل ہوسکتی ہیں۔