نیتن یاہو کے ایک بار پھر اسرائیل کے وزیر اعظم بننے کے امکانات روشن ہوگئے

By admin On نومبر 3, 2022

نیتن یاہو کے 2019 کے بعد ایک بار پھر اسرائیل کے وزیر اعظم بننے کے امکانات روشن ہوگئے ہیں۔

غیرملکی خبر رساں ادارے کے مطابق نیتن یاہو کو 2019 میں 12 سال کے اقتدار کے بعد شکست کا سامنا کرنا پڑا تھا تاہم ان کے اقتدار کے خاتمے کے ساڑھے تین سال بعد ایک مرتبہ پھر وزیر اعظم بننے کے امکانات روشن ہوگئے ہیں۔

نیتن یاہو کو سبکدوش ہونے والے وزیر اعظم یائر لپید نے 2019 میں شکست دی تھی جب کہ اس مرتبہ یائر لپید اور ان کے معتدل مزاج سیاسی اتحاد کو 54 یا 55 نشستیں ملنے کا امکان ہے۔

رپورٹ کے مطابق نیتن یاہو کے اتحاد کو 120 نشستوں میں سے 61 یا 62 نشستیں ملنے کی امید ہے اور وزیر اعظم بننے کے لیے انہیں 61 یا اس سے زائد نشستیں درکار ہیں۔

واضح رہے کہ نیتن یاہو کا 2019 میں کرپشن کے الزامات کی وجہ سے 12 سال پر محیط دورِ حکمرانی اختتام پذیر ہوا تھا جس کے بعد سے اسرائیل میں سیاسی استحکام نہیں آسکا ہے اور ساڑھے تین سال میں پانچویں مرتبہ الیکشن ہورہے ہیں۔

گذشتہ روز پانچویں مرتبہ الیکشن ہوئے جس میں ووٹنگ کا عمل رات 10 بجے تک جاری رہا اور اب نتائج آنے کا سلسلہ جاری ہے۔

ان الیکشن کی خاص بات یہ ہے کہ اس مرتبہ سخت گیر دائیں بازو کی یہودی جماعت ’حداش جبہ‘ کے بھی 4 ارکان منتخب ہوکر اسمبلی میں پہنچ گئے ہیں جو نیتن یاہو کی جماعت لیکوڈ پارٹی کے اتحادی بھی ہیں۔

رپورٹس ہیں کہ نیتن یاہو کو کرپشن کے الزامات اور فراڈ کیسز کا سامنا ہے جس کے باعث یہ خیال بھی ظاہر کیا جارہا ہے کہ نیتن یاہو کی بجائے یہودی آبادکاری کے حامی اور فلسطینیوں کے سخت مخالف یہودی رہنما ایتماربن غفیر کو موقع دیا جائے گا۔