شاہد آفریدی کا ٹی ٹوئنٹی ورلڈ کپ فائنل کے لیے قومی ٹیم کو مفید مشورہ

By admin On نومبر 11, 2022

سابق کپتان شاہد آفریدی نے ٹی ٹوئنٹی ورلڈ کپ فائنل کے لیے قومی ٹیم کو بہادری سے لڑنے کا مشورہ دے دیا ہے۔

میڈٰیا سے گفتگو کرتے ہوئے بوم بوم آفریدی کا کہنا تھا کہ پاکستانی ٹیم میں انگلینڈ کو شکست دینے کی اہلیت ہے، اگر ہارنے کا خوف دل سے نکال کر کھیلیں تو یہ جیت سکتے ہیں۔

انہوں نے کہا کہ پاکستان اور انگلینڈ کی ٹیمیں ہم پلہ ہیں لیکن اس میچ میں فیلڈنگ اہم فرق ثابت ہوسکتی ہے جب کہ سیمی فائنل میں پاکستان اپنی بہترین فیلڈنگ کی وجہ سے جیتا۔

ان کا کہنا تھا کہ بولرز نے پورے ٹورنامنٹ میں اچھا پرفارم کیا لیکن ہمیں بولرز کو کم از کم 160 رنز بناکر دینا ہوں گے۔

سابق کپتان نے کہا کہ شکر ہے کہ حارث کو اوپر کھلایا جارہا ہے کیونکہ ان کی وجہ سے مخالف بولرز پر پریشر آجاتا ہے۔

شاہد آفریدی کہتے ہیں کہ ملک میں کرکٹ کی وجہ سے لوگوں کے چہروں پر مسکراہٹ آتی ہے اور اگر پاکستان ٹرافی جیت کر لاتا ہے تو اس سے بڑی کوئی خوشی نہیں ہوگی۔

انہوں نے مزید کہا کہ ٹی ٹوئنٹی ورلڈ کپ کے میچز دیکھ کر مزہ آرہا ہے لیکن اس مرتبہ کوالیفائی کرنا 1992 ورلڈ کپ سے بھی مشکل تھا، خواہش ہے کہ پاکستان اس ورلڈ کپ کو ٹرافی کے ساتھ یادگار بنائے۔

واضح رہے کہ پاکستان ٹی ٹوئنٹی ورلڈ کپ کے سیمی فائنل میں نیوزی لینڈ کو 7 وکٹوں سے شکست دے کر فائنل میں پہنچا ہے۔

ٹی ٹوئنٹی ورلڈ کپ کا فائنل 13 نومبر بروز اتوار کو میلبرن کرکٹ گراؤنڈ میں کھیلا جائے گا جس میں پاکستان کے مدمقابل انگلینڈ ٹیم ہوگی۔