پاکستان کے قونصل جنرل حسین محمد کی پاکستان بزنس کونسل دبئی کے اراکین سے ملاقات
دبئی(اردوویکلی)::پاکستان کے قونصل جنرل حسین محمد نے آج پاکستان بزنس کونسل دبئی کے نئے بورڈ کے ساتھ سے ملاقات کی۔ ملاقات میں پی بی سی کے چیئرمین شبیر مرچنٹ نے نئے شامل اراکین کا تعارف کرایا اور 2025-2026 کے لیے کونسل کا سٹریٹجک روڈ میپ شیئر کیا ۔ انہوں نے کہا کہ پی بی سی کا مقصد تجارت ، سرمایہ کاری اور ثقافتی تبادلوں میں باہمی کوششوں کے ذریعے پاکستان اور متحدہ عرب امارات کے درمیان تعلقات کو مستحکم کرنا ہے ۔ شبیر مرچنٹ نےکہا کہ کونسل باہمی ترقی کے مواقع سے فائدہ اٹھانے اور دونوں ممالک کے درمیان گہرے تعلقات کو فروغ دینے کے لیے پرعزم ہے ۔
ملاقات میں بورڈ کے نئے اراکین کوقونصل جنرل حسین محمد نے مبارکباد دی اور ان کے لیے نیک خواہشات کا اظہار کیا ۔ انہوں نے متحدہ عرب امارات میں پاکستان کی اقتصادی صلاحیت کو فروغ دینے میں پی بی سی کی کوششوں کو سراہا ۔قونصل جنرل نے پی بی سی اراکین کی حوصلہ افزائی کی کہ وہ پاکستان اور متحدہ عرب امارات کے درمیان دو طرفہ تجارت اور سرمایہ کاری کو بڑھانے کے لیے ٹھوس اقدامات کریں ۔قونصل جنرل نے کہا کہ وہ پاکستان کے مختلف شعبوں بشمول آئی ٹی ، مینوفیکچرنگ ، زراعت اور سیاحت میں مواقع تلاش کریں ۔ انہوں نے کہا کہ پاکستان میں سرمایہ کاری اور تجارت کے بے پناہ امکانات موجودہیں ، سرمایہ کاروں کو سہولت فراہم کرنے کے لیے خصوصی سرمایہ کاری سہولت کونسل (ایس آئی ایف سی) کو ون ونڈو کے طور پر قائم کیا گیا ہے ۔انہوں نے پاکستان بزنس کونسل پر زور دیا کہ وہ نئی شراکت داریوں کے قیام اور موجودہ شراکت داریوں کی توسیع کے لیے ایک پل کے طور پر کام کریں ۔
قونصل جنرل نے کونسل کو قونصلیٹ کی حمایت کا یقین دلایا اور پاکستان اور متحدہ عرب امارات کے تعلقات کو مستحکم کرنے کے مشن کے عزم کا اعادہ کیا ۔
اجلاس میں ٹریڈ اینڈ انویسٹمنٹ قونصلر علی زیب خان اور قونصل خانے کے دیگر اعلی حکام اور پی بی سی کے اراکین نے بھی شرکت کی ۔
