چوہدری سالک حسین کی ڈائریکٹر جنرل عوامی اتھارٹی برائے افرادی قوت کویت سے دبئی میں ملاقات

وفاقی وزیر چوہدری سالک حسین نے کویتی فریق کو دورہ پاکستان کی دعوت بھی دی۔

دبئی(نیوزڈیسک)::ابوظہبی ڈائیلاگ 2026 کے موقع پر، وفاقی وزیر برائے سمندر پار پاکستانی اور انسانی وسائل کی ترقی چوہدری سالک حسین نے دبئی میں عوامی اتھارٹی برائے افرادی قوت  کے ڈائریکٹر جنرل محترمہ رباب عبداللہ العثیمی سے ملاقات کی۔ ملاقات میں پاکستان اور ریاست کویت کے درمیان لیبر سیکٹر میں تعاون کو مزید مستحکم کرنے کااعادہ کیاگیا۔

وفاقی وزیر نے کہا کہ پاکستان کویت کے ساتھ اپنے دیرینہ اور مضبوط تعلقات کو بہت اہمیت دیتا ہے اور مجوزہ لیبر میمورنڈم آف انڈرسٹینڈنگ (ایم او یو) پر دستخط کرنے کے لیے تیار ہے جسے کویت کے ولی عہد کے پاکستان کے آئندہ دورہ کے دوران حتمی شکل دی جا سکتی ہے۔

دونوں فریقوں نے حالیہ اعلیٰ سطحی تبادلوں کے مثبت نتائج کا بھی جائزہ لیا، کویتی حکام کے تعمیری ردعمل کو نوٹ کیا، اور مزدور تعاون کو بڑھانے کے اقدامات پر تبادلہ خیال کیا۔ وفاقی وزیر نے بھرتی کے عمل کو آسان بنانے کے لیے پاکستانی ورکرز اور بیرون ملک روزگار کے فروغ دینے والوں کے لیےعوامی اتھارٹی برائے افرادی قوت کویت پورٹل تک رسائی کی درخواست کی۔

پاکستانی افرادی قوت کی شراکت پر زور دیتے ہوئے، انہوں نے کہا کہ پاکستانی کارکنوں نے تاریخی طور پر کویت کی ترقی میں اہم کردار ادا کیا ہے اور کویت کی مستقبل کی ضروریات بالخصوص انفراسٹرکچر اور دیگر اہم شعبوں میں مہارتوں اور صلاحیتوں کے حامل ہیں۔دونوں فریقوں نے مزدور تعاون کو آگے بڑھانے اور باقاعدہ باہمی مشاورت اور مصروفیات کو ادارہ جاتی شکل دینے پر اتفاق کیا۔ وفاقی وزیر چوہدری سالک حسین نے کویتی فریق کو دورہ پاکستان کی دعوت بھی دی۔