امریکی صدر جو بائیڈن نے یوکرین کے لیے دفاع اور سلامتی کی مد میں 15 کروڑ ڈالر کے نئے فوجی امدادی پیکج کا اعلان کیا ہے۔
فرانسیسی خبر رساں ادارے اے ایف پی کے مطابق امریکی صدر جو بائیڈن نے جمعہ کے روز فوجی امداد کے پیکج کا اعلان کرتے ہوئے کہا کہ اس کے ذریعے یوکرین کو جنگی اسلحہ اور ریڈارز کے علاوہ دیگر ساز و سامان فراہم کیا جائے گا۔
صدر جو بائیڈن نے کانگریس پر بھی زور دیا ہے کہ یوکرین کے لیے مزید 33 ارب ڈالر کے امدادی پیکج کی منظوری دی جائے۔
امریکی وزیر خارجہ انٹونی بلنکن کے مطابق 24 فروری کو یوکرین پر حملے کے بعد سے امریکا اب تک 3 ارب 80 کروڑ ڈالر کی مالیت کے ہتھیار کیف کو دے چکا ہے جس میں اینٹی ایئر کرافٹ اسٹنگر میزائل، ڈرونز اور بھاری اسلحہ شامل ہے۔
صدر جو بائیڈن نے ایک بیان میں کہا ہے کہ امریکا نے یوکرین کو انتہائی تیز رفتاری کے ساتھ تاریخی امداد فراہم کی ہے۔ امریکا نے یوکرین کی آزادی کے لیے اگلی صفوں میں لڑنے والوں کو براہ راست اسلحہ اور حربی ساز و سامان فراہم کیا ہے جس کی کانگریس نے منظوری دی ہے۔
تاہم امریکی صدر بائیڈن کا کہنا تھا کہ یوکرین کے لیے منظور شدہ فنڈز ختم ہونے کے قریب ہیں اور یوکرین کی جیت کے لیے انتہائی ضروری ہے کہ امریکا اور اس کے اتحادی بغیر کسی تعطل کے اسلحہ کی ترسیل جاری رکھیں۔
اتوار کو یوکرین کے صدر ولودیمیر زیلنسکی ایک ورچوئل اجلاس میں شرکت کریں گے جس میں امریکی صدر جو بائیڈن کے علاوہ جی سیون ممالک کے سربراہان بھی شرکت کریں گے۔ اجلاس میں روس کے خلاف مغربی ممالک کی جانب سے فراہم ہونے والی امداد پر غور کیا جائے گا۔