سعودی عرب نے عالمی سطح پر اعلان کیا ہے کہ وہ شراب سے متعلق اپنے قوانین میں تبدیلی نہیں کرے گا۔
سوئٹزر لینڈ کے شہر ڈیووس میں جاری عالمی اقتصادی فورم 2022ء میں سعودی معاون وزیر سیاحت شہزادی ھیفا بنت محمد نے اظہار خیال کرتے ہوئے کہا ہے کہ سعودی عرب شراب پر پابندی کے قوانین تبدیل نہیں کرے گا۔
عکاظ اخبار کے مطابق سعودی معاون وزیر سیاحت شہزادی ھیفا نے یہ وضاحت ڈیوس اکنامک فورم میں سعودی عرب مستقبل کا تصور کے عنوان سے ہونے والے مباحثے کے دوران دی۔
مباحثے کے دوران شہزادی ھیفا سے سوال کیا گیا تھا کہ ۔۔ کہا جارہا ہے کہ سعودی عرب مستقبل کے شہر نیوم میں شراب پرعائد پابندی کے حوالے سے نظر ثانی کر رہا ہے۔ یہ میڈیا رپورٹس کہاں تک درست ہیں؟
Advertisement
شہزادی ھیفا بن محمد نے کہا کہ سعودی عرب نے شراب پر پابندی کے باجود سیاحت کو فروغ دیا اورعالمی سطح پر شاندار کارکردگی کا مظاہرہ کیا ہے۔ ایک اور سوال کا جواب دیتے ہوئے انہوں نے کہا کہ سعودی شفاف پالیسی پر عمل پیرا ہیں۔ سعودی عرب موجودہ قوانین کا نفاذ جاری رکھے گا اور یہ قوانین اچھے ہیں۔
شہزادی ھیفا نے کہا کہ اعداد و شمار نے ثابت کردیا ہے کہ سعودی عرب نے سیاحت کے شعبے میں عالمی سطح پر کامیابی حاصل کی ہے۔ تبدیلیوں کے بغیر کافی کچھ کیا جا سکتا ہے۔
یاد رہے کہ پبلک انویسٹمنٹ فنڈ کے ماتحت نیوم کمپنی نے بھی اس سے قبل ایک بیان میں کہا تھا کہ نیوم اقتصادی علاقہ ہے جو سعودی عرب کے ماتحت ہے۔ یہاں سعودی قوانین نافذ ہوں گے۔ امن، دفاع اور سرحدی تحفظ کے حوالے سے جو قوانین سعودی عرب کے دیگر مقامات پر نافذ ہیں وہی نیوم میں بھی ہوں گے۔