عمر گل نے بابر اعظم اور رضوان کے خلاف پلان تیار کرلیا

By admin On ستمبر 6, 2022

افغانستان کرکٹ ٹیم کے بولنگ کوچ عمر گل کا کہنا ہے کہ بابر اعظم اور محمد رضوان کے خلاف پلان تیار کرلیا ہے۔

افغانستان کرکٹ ٹیم کے بولنگ کوچ عمر گل کا پریس کانفرنس کرتے ہوئے کہنا تھا کہ افغانستان ٹیم سپر فور میں پہلا میچ نہیں جیت سکی۔

انہوں نے کہا کہ گروپ میچز میں ٹیم نے اچھی کارکردگی دکھائی، پر اعتماد ہیں کہ کل کے میچ میں اچھا کھیلیں گے۔

ان کا کہنا تھا کہ بابر اور رضوان ورلڈ کلاس پلیئر ہیں اور ان کے خلاف پلان تیار کیا ہوا ہے، جو پلان بنایا ہے دیکھتے ہیں کہ بولرز ان پر کیسے عمل کرتے ہیں۔

عمر گل کہتے ہیں کہ افغانستان ٹیم نے جو غلطیاں پچھلے میچ میں کیں انہیں نہیں دہرائیں گے، پاکستان کے خلاف ایک اچھا میچ ہوگا، شارجہ میں بہت جوش خروش ہے۔

افغان ٹیم کے بولنگ کوچ کا کہنا تھا کہ شارجہ میں افغانستان ٹیم کے بہت فینز ہیں، امید ہے کہ شائقین کرکٹ اسٹیڈیم آئیں گے۔ ٹی ٹونٹی ورلڈ کپ میں جو میچ ہوا اسے بھلا کر میدان میں اتریں گے اور نئے میچ پر فوکس ہوگا۔

ان کا کہنا ہے کہ ہر کھلاڑی کو اپنے رول کا علم ہونا چاہیے جب میں کھیلتا تھا تو ڈیتھ کے اوورز کرانا میرا رول تھا، نسیم شاہ کے ساتھ کوئٹہ گلیڈی ایٹرز میں رہا ہوں جب کہ نسیم شاہ میں بہتری آئی ہے اور میری ان کے ساتھ نیک خواہشات ہیں۔

عمر گل کا کہنا تھا کہ ہار جیت کھیل کا حصہ ہے دونوں ملکوں کے فینز کو کہوں گا کہ اسے میچ ہی لینا چاہیے، ہم دونوں ہمسایہ ممالک ہیں اور ہم مسلمان ملک ہیں ایک دوسرے کو اسپورٹ کرنا چاہیے۔

انہوں نے کہا کہ بیٹرز کی طرح پاکستان کے خلاف میچ میں بولرز کے لئے پلان بنایا ہوا ہے۔

شاہین آفریدی کے حوالے سے بات کرتے ہوئے ان کا کہنا تھا کہ ان کی کمی محسوس کی جارہی ہے کیونکہ وہ پاکستان کے تجربہ کار بولر ہیں جب کہ شاہین آفریدی کے علاوہ بھی بولرز باصلاحیت ہیں اور تیز گیندیں کر رہے ہیں۔

نسیم شاہ، شاہ نواز دھانی اور حسنین ابھی نوجوان ہیں کسی کے متبادل ہونے کا کہنا جلدی ہوگی، کیچ ڈراپ ہونا کھیل کا حصہ ہے۔ میری بولنگ پر جب کیچ ڈراپ ہوتا تو مجھے غصے نہیں آتا تھا۔

بابر اعظم کے حوالے سے گفتگو کرتے ہوئے ان کا کہنا تھا کہ بابراعظم اہم کھلاڑی ہیں بیٹنگ ان کے ارد گرد گھومتی ہے، میری خواہش ہے کہ وہ رنز کریں کیونکہ فارم میں واپس آنا مشکل نہیں۔

بابر اعظم کا رنز نہ کرنا افغانستان کے لئے اچھا ہوسکتا ہے، بابر اعظم اور محمد رضوان جب کریز پر ہوں تو بیٹنگ دیکھتے ہوئے اچھا لگتا ہے۔

انہوں نے مزید کہا کہ ویرات کوہلی نے بھی لمبے وقفے کے بعد رنز کیے ہیں، ہر کوئی چاہتا تھا کہ وہ رنز کریں۔ بابر اعظم بھی جلد رنز کریں گے، ان کو اتنا لمبا وقفہ نہیں ہوا ہے۔