ورلڈ اسنوکر چیمپئن شپ؛ پاکستانی کھلاڑی احسن رمضان کوارٹر فائنل میں پہنچ گئے
پاکستانی کھلاڑی احسن رمضان امریکہ میں ہونے والی ورلڈ اسنوکر چیمپئن شپ کے کوارٹر فائنل میں پہنچ گئے ہیں۔
امریکہ کے شہر برمنگھم میں ہونے والی ورلڈ اسنوکر چیمپئن شپ میں پاکستانی کھلاڑی اور عالمی چیمپئن احسن رمضان نے پہلے میچ میں کامیابی حاصل کرلی ہے۔
انہوں نے پہلے میچ میں امریکہ کے نیشنل چیمپئن احمد علی سید کو 5 فریمز پر مشتمل میچ میں1-3 سے شکست دی ہے جس کے بعد وہ کوارٹر فائنل میں پہنچ گئے ہیں۔
احسن رمضان نے مقابلے کا پہلا فریم جیتا جس کے بعد دوسرے فریم میں انہیں ناکامی کا سامنا کرنا پڑا تاہم تیسرا اور چوتھا فریم جیت کر میچ میں انہوں نے کامیابی اپنے نام کی۔
Advertisement
ورلڈ اسنوکر چیمپئن شپ جیتنے والے پلیئر کو 10 ہزار پاؤنڈز اسٹرلنگ کے مساوی انعامی رقم دی جائے گی جبکہ یہ چیمپئن شپ ورلڈ کنفیڈریشن آف پلیئرز اسپورٹس کے تحت کھیلی جارہی ہے۔
واضح رہے کہ پاکستان کے 16 سالہ اسنوکر پلیئر احسن رمضان نے گذشتہ سال مارچ میں ورلڈ اسنوکر چیمپئن شپ کا ٹائٹل جیت کر تاریخ رقم کی تھی۔
یہ بھی پڑھیں: ورلڈ کپ اسنوکر چیمپئن شپ، پاکستان کے3کھلاڑیوں نے کوارٹر فائنل کیلئے کوالیفائی کرلیا
انہوں نے دوحہ میں منعقدہ انٹرنیشنل بلیئرڈز اینڈ اسنوکر فیڈریشن (آئی بی ایس ایف) ورلڈ اسنوکر چیمپئن شپ کا ٹائٹل اپنے نام کیا تھا۔
احسن رمضان نے فائنل میں ایران کے عامر سرکوش کو دلچسپ مقابلے کے بعد 5-6 سے شکست دی تھی جبکہ جس کے بعد وہ ورلڈ اسنوکر چیمپئن شپ جیتنے والے تیسرے کم عمر کھلاڑی بھی بن گئے ہیں۔