طالبان کا روس سے بڑا تجارتی معاہدہ

By admin On ستمبر 28, 2022

افغانستان میں طالبان حکومت نے روس سے پیٹرول، ڈیزل، گیس اور گندم کی فراہمی کے لیے بڑے تجارتی معاہدے پر دستخط کردیے ہیں۔

غیر ملکی خبر رساں ادارے کے مطابق افغانستان کے قائم مقام وزارت صنعت و تجارت حاجی نور الدین عزیزی کا کہنا ہے کہ روس نے طالبان انتظامیہ کو اشیائے خورونوش میں رعایت کی پیشکش کی ہے۔

انہوں نے کہا کہ ہماری وزارت تجارتی شراکت داری میں اضافہ چاہتی ہے، اس معاہدے کے تحت روس افغانستان کو دس لاکھ ٹن پیٹرول، دس لاکھ ٹن ڈیزل، پانچ لاکھ ٹن ایل پی جی اور 20 لاکھ ٹن گندم سالانہ سپلائی کرے گا۔

ان کا کہنا تھا یہ معاہدہ تجرباتی بنیاد پر غیر معینہ مدت کے لیے کیا جائے گا اور اگر دونوں فریقین کے درمیان معاملات اور انتظامات پر اطمینان کا اظہار کیا جاتا ہے تو پھر طویل المدتی معاہدے پر دستخط ہوں گے۔

انہوں نے مزید کہا کہ ین الاقوامی اعدادوشمار کے مطابق زیادہ تر افغان شہری غربت سے نیچے زندگی گزار رہے ہیں۔

رپورٹ کے مطابق افغانستان کو پیٹرول، ڈیزل، گیس اور گندم سڑکوں اور ٹرین کے ذریعے فراہم کیا جائے گا۔

واضح رہے کہ طالبان کے اقتدار پر قبضے کے بعد سے افغانستان کو معاشی بحران کا سامنا ہے، طالبان کا یہ پہلا بین الاقوامی تجارتی معاہدہ ہے جب کہ گذشتہ ماہ ہی افغانستان کے صنعت و تجارت کے وزیر حاجی نورالدین عزیزی نے روس کا دورہ کیا تھا۔

یاد رہے کہ روس نے اب تک باضابطہ طور پر طالبان حکومت کو تسلیم نہیں کیا ہے لیکن کابل میں روس کا سفارت خانہ اب بھی کام کررہا ہے۔

دوسری جانب روس کے توانائی اور زراعت کے وزراء نے فوری طور پر معاہدے کے حوالے سے کسی تبصرے سے گریز کیا ہے جب کہ روس کے تیل اور گیس کے محکمے کی جانب سے بھی کوئی تبصرہ سامنے نہیں آیا ہے۔