افغان ٹیم ٹی ٹوئنٹی ورلڈ کپ سے باہر، محمد نبی نے کپتانی سے استعفیٰ دے دیا

By admin On نومبر 6, 2022

ٹی ٹوئنٹی ورلڈ کپ کے سپر 12 مرحلے کے میچ میں آسٹریلیا سے شکست کے بعد افغان ٹیم ٹورنامنٹ سے باہر ہوگئی ہے۔

ٹی ٹوئنٹی ورلڈ کپ کے سپر 12 مرحلے کے میچ میں آج افغانستان کا مقابلہ میزبان ٹیم آسٹریلیا سے ہوا جس میں انہیں سنسنی خیز مقابلے کے بعد 4 رنز سے شکست کا سامنا کرنا پڑا۔

اس میچ میں افغان ٹیم کے کپتان محمد نبی نے ٹاس جیت کر فیلڈنگ کرنے کا فیصلہ کیا اور آسٹریلیا نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 168 رنز اسکور کیے۔

ہدف کے تعاقب میں افغان ٹیم نے شاندار کھیل کا مظاہرہ کرتے ہوئے آسٹریلیا جیسی ٹیم سے کڑا مقابلہ کیا تاہم انہیں 4 رنز سے شکست ہوئی جس کے بعد ٹی ٹوئنٹی ورلڈ کپ میں ان کا سفر ختم ہوگیا ہے۔

ٹیم ٹی ٹوئنٹی ورلڈ کپ سے باہر ہونے پر جہاں افغان کھلاڑی افسردہ دکھائی دیے وہی افغان ٹیم کے کپتان محمد نبی نے کپتانی سے مستعفی ہونے کا اعلان کیا ہے۔

محمد نبی کا سماجی رابطے کی سائٹ پر کپتانی سے سبگدوشی کا اعلان کرتے ہوئے کہنا تھا کہ پچھلے ایک سال سے ٹیم کی تیاری ایسی نہیں تھی جو ایک کپتان بڑے ایونٹ کے لیے ٹیم سے چاہتا ہے۔

pic.twitter.com/oSpzXxMFGB

— Mohammad Nabi (@MohammadNabi007) November 4, 2022

انہوں نے لکھا کہ پچھلے کچھ دوروں میں ٹیم انتظامیہ، سلیکشن کمیٹی اور وہ ایک پیج پر نہیں تھے جس کے اثرات ٹیم پر مرتب ہوئے۔

انہوں نے مزید لکھا اس تمام صورت حال میں وہ کپتانی سے مستعفی ہورہے ہیں لیکن بطور کھلاڑی کھیل جاری رکھیں گے۔

واضح رہے کہ محمد نبی کو گذشتہ سال راشد خان کے بطور کپتان استعفیٰ دینے کے بعد کپتان بنایا گیا تھا جب کہ راشد خان نے کپتان بننے کے آدھے گھنٹے بعد ہی استعفیٰ دیا تھا۔