عراق کے صوبے نینوا کے ضلع ہمدانیہ میں شادی کی تقریب میں آگ لگنے سے اموات کی تعداد 113 ہو گئی، حادثے میں 150 سے زائد افراد زخمی ہوئے ہیں۔
عراقی وزارتِ داخلہ کے مطابق ہال کے 4 مالکان کے خلاف گرفتاری کے وارنٹ جاری کیے گئے جبکہ ایک کو گرفتار کر لیا گیا ہے۔
غیر ملکی خبر ایجنسی کے مطابق عراقی صدر نے ضلع ہمدانیہ کے ہال میں آگ لگنے کی تحقیقات کا حکم دے دیا ہے۔
دوسری جانب عرب میڈیا کا کہنا ہے کہ شادی کی تقریب کے دوران ہال میں آتشزدگی کے وقت ایک ہزار سے زائد افراد تقریب میں شرکت کے لیے وہاں موجود تھے۔
ابتدائی معلومات کے مطابق آتش بازی کو آگ لگنے کا سبب قرار دیا جا رہا ہے۔
عراقی حکام کا کہنا ہے کہ زخمیوں کی اکثریت جھلسنے اور دم گھٹنے سے متاثر ہوئی ہے، جائے وقوع پر بھیڑ کو کچلنے کے واقعات بھی رونما ہوئے ہیں۔
واضح رہے کہ ضلع ہمدانیہ میں منگل کی رات شادی ہال میں آگ لگنے کا افسوس ناک واقعہ پیش آیا تھا۔