سفیرپاکستان کابرطانوی یونیورسٹی دبئی کادورہ، طلباء سے ملاقات
پاکستان اور متحدہ عرب امارات کے درمیان دیرینہ تعلقات اور گہری دوستی مشترکہ اقدار، ثقافتی رشتوں اور علاقائی و عالمی سطح پر باہمی تعاون پر مبنی ہے، سفیر فیصل نیاز ترمذی![]()
دبئی(اردوویکلی)::متحدہ عرب امارات میں پاکستان کے سفیر فیصل نیاز ترمذی نے گزشتہ روزدبئی میں برٹش یونیورسٹی کا دورہ کیا، جہاں وائس چانسلر پروفیسر عبداللہ الشامسی اور فیکلٹی ممبران نے ان کا پرتپاک استقبال کیا۔ اپنے دورے کے دوران، سفیر فیصل نیازترمذی نے پاکستان اور متحدہ عرب امارات کے درمیان تاریخی اور اسٹریٹیجک تعلقات پر ایک بصیرت انگیز لیکچر دیا۔
انہوں نے پاکستان کے بھرپور ثقافتی ورثے پر روشنی ڈالی، اس کی جڑیں وادی سندھ اور گندھارا جیسی قدیم تہذیبوں سے ملتی ہیں۔ سفیر نے ملک کے متنوع جغرافیہ پر بھی زور دیا، بشمول ہمالیہ، قراقرم، اور ہندو کش پہاڑی سلسلے، جن میں دنیا کی 8,000 میٹر سے بلند چودہ چوٹیوں میں سے پانچ شامل ہیں
پاکستان اور یو اے ای کے درمیان تعلقات بارے بات کرتے ہوئے انہوں نے دونوں ممالک کے درمیان 70 سال سے زائد پر محیط دوستی کو اجاگر کیا جو مشترکہ اقدار، ثقافتی رشتوں اور علاقائی و عالمی سطح پر باہمی تعاون پر مبنی ہے۔ انہوں نے مرحوم شیخ زاید بن سلطان آلنہیان کی دور اندیش قیادت کو خراج عقیدت پیش کیا اور ان کے 1966 کے تاریخی دورہ پاکستان کا ذکر کیا۔ انہوں نے بتایا کہ پاکستان وہ پہلا ملک تھا جس نے یو اے ای کو تسلیم کیا اور بینکاری، ہوا بازی اور زراعت جیسے شعبوں میں اس کی ترقی میں اہم کردار ادا کیا۔ انہوں نے کہا کہ پاکستان اور یو اے ای کے درمیان دوطرفہ تجارت 10 ارب امریکی ڈالر سے تجاوز کر چکی ہے اور یو اے ای میں 18 لاکھ سے زائد پاکستانیوں کی متحرک برادری موجود ہے جو اقتصادی اور عوامی روابط کو مزید فروغ دے رہی ہے۔
انہوں نے حالیہ اعلیٰ سطحی ملاقاتوں کا حوالہ دیا جن میں وزیر اعظم محمد شہباز شریف اور یو اے ای کی اعلیٰ قیادت کی باہمی ملاقاتیں شامل ہیں جن کے نتیجے میں کئی مفاہمتی یادداشتوں پر دستخط ہوئے۔سفیر فیصل نیاز ترمذی نے طلباء کو مطالعہ اور سیاحت کی ترغیب دی اور اساتذہ و طلباء کو پاکستان آنے کی دعوت دی تاکہ وہ ملک کی قدرتی خوبصورتی، ثقافتی رنگا رنگی اور لذیذ کھانوں سے لطف اندوز ہو سکیں۔اوراپنی آنکھوں سے قدرتی نظاروں سے استفادہ کریں اورہماری روائتی وثقافتی وراثت بارے جان سکیں۔