پاکستانی اسپرنٹر شجر عباس نے قازقستان چیمپئن شپ میں گولڈ میڈل حاصل کرلیا
پاکستانی اسپرنٹر شجر عباس نے قازقستان میں ہونی والی 31 ویں کوسانوف میموریل انٹرنیشنل ایتھلیٹکس چیمپئن شپ میں گولڈ میڈل حاصل کرکے پاکستان کا نام روشن کردیا۔
قازقستان کے شہر الماتی میں ہونی والی 31 ویں کوسانوف میموریل انٹرنیشنل ایتھلیٹکس چیمپئن شپ کی 100 میٹر ریس میں پاکستانی اسپرنٹر شجر عباس نے گولڈ میڈل حاصل کیا ہے۔
Very impressive Sprinter Shajjar Abbas grabbing Gold for Pakistan in Almaty Kazakhstan 🥇️🇵🇰
#pakatheletics pic.twitter.com/ffa0ZDrwGC— Makhmoor Ali Dahani (@dahani_makhmoor) June 25, 2022
Advertisement
پاکستان کے شہر ساہیوال سے تعلق رکھنے والے اسپرنٹر نے اس سے قبل 100 میٹر ریس میں نیا قومی ریکارڈ بھی قائم کیا تھا۔
انہوں نے 10.38 سیکنڈ میں ٹریک مکمل کر کے 2005 کے اسلامک گیمز میں قومی کھلاڑی افضل بیگ کا 10.42 سیکنڈ کا سابقہ ریکارڈ توڑا تھا۔
علاوہ ازیں شجر عباس نے ایران میں منعقدہ ایک تقریب میں 200 میٹر کیٹیگری میں 20.91 سیکنڈ میں ٹریک مکمل کرکے ریکارڈ بنایا تھا۔
دوسری جانب کوسانوف میموریل انٹرنیشنل ایتھلیٹکس چیمپئن شپ میں ایک اور پاکستانی اسپرنٹر عبدالمجید بلوچ نے مردوں کی 400 میٹر ریس کے فائنل میں کانسی کا تمغہ حاصل کیا ہے۔
اس کیٹیگری میں قازقستان نے پہلی پوزیشن حاصل کی ہیں جبکہ دوسرے نمبر پر بھارت اور تیسرے نمبر پر پاکستانی اسپرنٹر رہے ہیں۔
قازقستان کے مکسائل لٹوین نے 400 میٹر ریس میں 46.04 سیکنڈ میں دوڑ مکمل کرکے گولڈ میڈل حاصل کیا جبکہ بھارت کے محمد انس یاہا نے 46.27 سیکنڈ میں فائنل لائن عبور کرکے چاندی کا تمغہ حاصل کیا۔
عبدالمجید بلوچ 46.86 سیکنڈ میں ریس مکمل کرکے تیسرے نمبر پر رہے ہیں۔