ایشیا کپ کی تیاری کے لیے روزانہ 100 سے 150 چھکے مارتا ہوں، آصف علی

By admin On اگست 26, 2022

پاکستان کے پاور ہٹر بیٹر آصف علی نے دعویٰ کیا ہے کہ وہ ٹی ٹوئنٹی ایشیا کپ 2022 کی تیاری کے لیے روزانہ 100 سے 150 چھکے مارتے ہیں۔

نیشنل ہائی پرفارمنس سینٹر (این ایچ پی سی) میں ٹریننگ کرتے ہوئے آصف علی نے کہا ہے کہ وہ ایسی پوزیشن پر بیٹنگ کرتے ہیں جس کے لیے انہیں سیریز اور ٹورنامنٹس سے قبل اپنے بڑے شاٹس کی تربیت کی ضرورت ہوتی ہے۔

آصف علی نے پی سی بی کو انٹرویو دیتے ہوئے کہا کہ ’’میں ایسی پوزیشن پر بیٹنگ کرتا ہوں جہاں اوسطاً 10 سے زیادہ رنز بنانے کی ضرورت ہوتی ہے جب کہ بڑے شاٹش مارنے کے لیے آپ کو کافی مشق کرنی ہوتی ہے‘‘۔

انہوں نے کہا کہ میں عام طور پر روزانہ 100 سے 150 چھکے مارتا ہوں تاکہ میچ میں 4 سے 5 چھکے مار سکوں۔

آصف علی کہتے ہیں کہ وہ ایک ہی شاٹ کو دو بار کھیلنے کے بارے میں کبھی نہیں سوچتے کیونکہ ٹی ٹوئنٹی انٹرنیشنل کرکٹ جدت کا مطالبہ کرتی ہے۔

ان کا مزید کہنا تھا کہ یہ میچ کی صورت حال پر منحصر ہے۔ جب میں ٹی ٹوئنٹی میں بیٹنگ کرنے آتا ہوں تو ہمیشہ مجھ پر دباؤ رہتا ہے۔ میں گیند کو اس کی لائن اور لینتھ کے مطابق مارنے کی کوشش کرتا ہوں اور میں بار بار ایک ہی شاٹ کھیلنے کا کبھی نہیں سوچتا۔

واضح رہے کہ پاکستان کرکٹ ٹیم ایونٹ میں شرکت کے لیے بحفاظت دبئی پہنچ گئی ہے جب کہ قومی ٹیم 28 اگست کو روایتی حریف بھارت کے خلاف ایشیا کپ 2022 میں اپنی مہم کا آغاز کرے گی۔

یاد رہے کہ شاہین شاہ آفریدی گھٹنے کی انجری کے باعث اسکواڈ سے باہر ہوگئے ہیں جب کہ ان کی جگہ محمد حسنین کو ٹیم میں شامل کیا گیا ہے۔