ابوظہبی ، 16 اگست ، 2020 (وام) ۔۔ وزارت صحت و تحفظ کی جانب سے اتوار کو کیئے جانے والے اعلان کے مطابق گزشتہ 24 گھنٹوں کے دوران ملک میں کووڈ 19 کے مزید 65 ہزار 186 ٹیسٹ کیئے گئے جس کے دوران جدید ترین طبی تشخیصی ذرائع کا استعمال ہوا – وزارت کی طرف سے جاری بیان کے مطابق ملک گیر ٹیسٹنگ کے جاری اس عمل کا مقصد متاثرین کی جلد تشخیص کرکے انہیں فوری ضروری علاج معالجہ فراہم کرنا ہے ۔ مزید ٹیسٹ کے نتیجے میں کورونا وائرس کے نئے 210 مریضوں کی تشخیص ہوئی جو مختلف قومیت کے ہیں اور ان سب کی حالت سنبھلی ہوئی ہے جبکہ انہیں ضروری طبی نگہداشت بھی میسر آرہی ہے ۔ نئے مریضوں کے بعد ملک میں اس وائرس کے مجموعی متاثرین کی تعداد 64 ہزار 312 ہوگئی – وزارت نے بتایا ہے کہ کووڈ 19 کی وباء سے متاثرہ زیر علاج مریضوں میں سے مزید 3 مریض طبی پیچیدگی کی وجہ سے وفات پاگئے جس سے اس وباء سے مرنے والوں کی مجموعی تعداد 364 ہوگئی ۔ وزارت نے مرنے والوں کے لواحقین سے دلی ہمدردی کا اظہار کرتے ہوئے دیگر مریضوں کی جلد صحتیابی کیلئے نیک خواہشات کا اظہار بھی کیا ہے ۔ وزارت نے معاشرے کے ارکان کو احتیاطی و حفاظتی اقدامات کا سلسلہ جاری رکھنے اور اس بارے میں دی جانے والی ہدایات کی پیروی کرنے کی تلقین بھی کی ہے – وزارت کے مطابق اس وباء کے زیر علاج مریضوں میں سے مزید 123 مکمل صحتیاب بھی ہوگئے جس کے بعد مکمل صحتیاب ہونے والوں کی تعداد بڑھ کر 57 ہزار 694 ہوگئی ہے