ایران نے اسرائیل کے لیے جاسوسی کرنے کے الزام میں ایک ایرانی نژاد سوئیڈش شہری کو سزائے موت سنائی ہے۔ ڈاکٹر اور محقق احمد رضا جلالی کو اپریل 2016ء میں ایران کے ایک تعلیمی دورے کے دوران حراست میں لیا گیا تھا۔
برطانوی خبر رساں ایجنسی روئٹرز نے ایران کی نیم سرکاری نیوز ایجنسی آئی ایس این اے کے حوالے سے خبر دی ہے کہ احمد رضا جلالی کو رواں ماہ کی 21 تاریخ کو ہی پھانسی دے دی جائے گی۔
عدالت میں دورانِ سماعت ایرانی پراسیکیوٹر کا کہنا تھا کہ جلالی نے اسرائیلی خفیہ ایجنسی موساد کے اہلکاروں سے آٹھ مرتبہ ملنے اور اس دوران ایرانی فوج اور ایٹمی سائنسدانوں سے متعلق خفیہ معلومات کی فراہمی کے عوض رقوم وصول کرنے کا اعتراف بھی کیا ہے۔
ایرانی عدالت کا یہ فیصلہ ایسے وقت میں سامنے آیا ہے جب 2019ء میں سوئیڈش حکام کی جانب سے گرفتار کیے گئے ایرانی پراسیکیوشن کے سابق اہلکار حامد نوری کو بین الاقوامی جنگی جرائم اور انسانی حقوق کی خلاف ورزیوں کے الزام میں سوئیڈن میں عمر قید کی سزا کا سامنا ہے۔
ایرانی اہلکار حامد نوری پر الزام ہے کہ انہوں نے 1988ء میں ایران کے شہر کرج کی گوہر دشت جیل میں حکومتی احکامات پر سیاسی قیدیوں کو پھانسی دینے میں اہم کردار ادا کیا تھا۔
سوئیڈن کے قانون کے تحت عدالتیں سوئیڈش شہریوں اور دیگر شہریوں کے خلاف بیرون ملک ہونے والے بین الاقوامی قانون کے خلاف جرائم کا مقدمہ چلا سکتی ہیں۔
ایران کی وزارت خارجہ کے حکام نے پیر کے روز سوئیڈش سفیر کو طلب کرکے ان مبینہ بے بنیاد اور من گھڑت الزامات پر احتجاج بھی کیا تھا جو سوئیڈش پراسیکیوٹر نے حامد نوری کے مقدمے کی عدالتی سماعت کے دوران ایران کے خلاف عائد کیے تھے۔