کوروناوبا کے باوجود پاکستان میں امارات پولیو مہم کامیاب رہی

ابوظہبی(اردوویکلی):: پولیو ڈے کے عالمی دن کے موقع پر امارات پولیو مہم نے اعلان کیا ہے کہ ماہ جولائی اور ستمبر 2020 کے دوران پاکستان میں 28 ملین سے زائد انسداد پولیو ویکسین فراہم کیں جس سے 16 ملین سے زائد بچے مستفید ہوئے۔ 2014 میں شروع کی گئی امارات پولیو مہم متحدہ عرب امارات کے پاکستان کیلئے اس امدادی پروگرام کا ایک حصہ ہے جو صدرمتحدہ عرب امارات عزت مآب شیخ خلیفہ بن زاید آل نھیان اور ولی عہد ابوظہبی و ڈپٹی سپریم کمانڈرمسلح افواج عزت مآب شیخ محمد بن زاید آل نھیان کی ہدایت پر شروع کیا گیا تھا۔ یہ مہم پاکستان کی مسلح افواج ، پولیو کے خاتمےکے عالمی اقدام، پاکستانی وزارت صحت اور صحت کی صوبائی وزارتوں کے تعاون سے ممکن ہوئی ہے۔ اس مہم کے تحت اب تک پاکستان بھر میں 483 ملین سے زیادہ انسداد پولیو ویکسین فراہم کی جاچکی ہیں جن سے 86 ملین بچے مستفید ہو چکے ہیں۔ متحدہ عرب امارات کے پاکستان کیلئے امدادی پروگرام کے ڈائریکٹر عبد اللہ خلیفہ الغفلی کا کہنا ہے کہ امارات پولیو مہم پاکستان میں پولیو کے پھیلاؤ کو روکنے اور بچوں کو اس موذی بیماری سے بچانے کے لئے عالمی سطح پر تعاون کو مستحکم کرنے کے شیخ محمد بن زاید آل نھیان کے عزم کی عکاسی کرتی ہے۔ یہ پروگرام اب تک لاکھوں بچوں تک یہ اہم ویکسی نیشن پہنچانے میں بہت بڑی حد تک کامیاب رہا ہے۔ انھوں نے کہا کہ ہر بچے کے صحت مند مستقبل کو یقینی بنانے کے لیئے ابھی مزید کام کرنے کی ضرورت ہے اور ہم اس بیماری کے خاتمےکیلئے آخری حد تک جائیں گے۔ اس سال کے شروع میں کوویڈ 19 کے پھیلاو کی وجہ سے دنیا بھر میں ویکسنیشن کے پروگرام روک دیئے گئے تھے اور ہیلتھ کمیونٹی کے متعدد رہنماؤں نے پولیو کے امکانی بحران کے بارے میں خبردار کیا تھا۔ تاہم امارات پولیو مہم نے ان نئے چیلنجوں پر قابو پالیا اور پولیو ویکسین دوبارہ شروع کرنے والا دنیا کا پہلا پروگرام بن گیا۔ جولائی اور اگست کے دوران فرنٹ لائن ہیلتھ ورکرز نے گھروں میں صحت کی سہولیات کے ساتھ ساتھ لاکھوں ماسک اور سینٹائزر تقسیم کیے۔ اس کے ساتھ ساتھ امارات پولیومہم نے وٹس ایپ اور سوشل میڈیا پلیٹ فارم کے استعمال سے کوویڈ19 کی روک تھام کے لئے ویڈیوز اور دیگر ڈیجیٹل مواد تقسیم کیا۔ شیخ محمد بن زاید نے اس بیماری کے خاتمے کے لئے 250 ملین ڈالر سے زیادہ کا وعدہ کیا ہے۔ انھوں نے 2019 میں پولیو کے خاتمے کے عالمی اقدام کے تحت فورم کی بھی میزبانی کی جس میں دنیا سے پولیو کے خاتمے کیلئے 2.8 ارب ڈالرکے وعدے کئے گئے تھے۔ اس سال آٹھواں سالانہ عالمی پولیو ڈے 24 اکتوبر کو منایا جارہا ہے