قونصلیٹ جنرل کی خصوصی ٹیم کا جنرل ڈائریکٹوریٹ آف ریذیڈنسی اینڈ فارن افیئرز دبئی کے العویر امیگریشن سینٹر کا دورہ۔

دبئی(اردوویکلی)::گزشتہ روزپاکستان قونصلیٹ جنرل کی خصوصی ٹیم نے جنرل ڈائریکٹوریٹ آف ریذیڈنسی اینڈ فارن افیئرز ، دبئی میں قائم کردہ العویر امیگریشن سینٹر کا دورہ کیا اور سینٹر میں مختلف ایمنسٹی سروسز کا مشاہدہ کیا۔ قونصل خانے کی جانب سے جاری کیئے گئے ایک بیان کے مطابق متحدہ عرب امارات کی حکومت کا ایمنسٹی کا اقدام افراد کو اپنی رہائش(اقامہ) کی حیثیت کو باقاعدہ بنانے اور امیگریشن سے متعلق کسی بھی بقایا قانونی معاملات کو حل کرنے کا ایک قیمتی موقع فراہم کرتا ہے۔ قونصلیٹ ٹیم کو افراد کی رہائش کے مسائل کو تیزی سے اور موثر طریقہ سے حل کرنے میں مدد کرنے کے لیے کیے گئے اقدامات کا جائزہ پیش کیا گیا۔ دورہ کرنے والی ٹیم نے متحدہ عرب امارات کی حکومت کی جانب سے تارکین وطن بالخصوص پاکستانیوں کے ساتھ مسلسل تعاون اور ہمدردی پرمتعلقہ احکام کاشکریہ اداکیا۔